Aqtaýda Mańǵystaýdyń 70-ten astam kásipkerleri men belsendilerin jınaǵan isker áıelder qaýymdastyǵy men áıelder kúshteri Alıansynyń keńeıtilgen otyrysy ótti.
Jıynǵa qatysýshylar áıelder kásipkerligi men jumyspen qamtýdy damytýdaǵy jahandyq jáne óńirlik trendterdi talqylady.
Mańǵystaý isker áıelder qaýymdastyǵynyń tóraǵasy Sholpan Ilmuhanbetova, qazir áıelder elimizdiń saıası jáne áleýmettik ómirinde úlken ról atqaratynyn aıtty. Onyń aıtýynsha, búgingi tańda 9 mln ekonomıkalyq belsendi azamattyń 4,3 mln-y áıelder. Elimizdegi barlyq pedagogtardyń 84%-dan astamyn jáne dárigerler men medısınalyq qyzmetkerlerdiń 80%-yn názik jandylar quraıdy.
«Jınalysty ótkizýdiń maqsaty - qaýymdastyq pen áıelder kúshteri Alıansy arasyndaǵy ózara is-qımyldy yntalandyrý. Sonymen qatar, árqıly salada qyzmet etetin áıelderdi oqytý jáne qoldaý, eldegi demokratııanyń damýyna yqpal etý jáne eńbekshi áıelderdiń áleýmettik mártebesin arttyrý bolyp tabylady. Búgingi tańda Mańǵystaýdyń ekonomıkalyq belsendi turǵyndarynyń jartysyna jýyǵy - áıelder. Biz áıelderdiń quqtaryn qorǵaý, otbasylyq qundylyqtardy damytý jáne áıelderdiń erlermen teń dárejede saıasat pen ekonomıkaǵa belsendi aralasýyn qamtamasyz etýge umtylamyz. Bizdiń maqsatymyz erlerdiń aldyna shyǵý emes, teń dárejede birlese áreket etý», dep atap ótti Sholpan Ilmýhanbetova.
О́ńir basshysy Nurlan Noǵaev qoǵamdaǵy turaqtylyq pen kelisimdi saqtaýda jáne damýda áıeldiń róli orasan zor ekenin atap ótti. Sondaı-aq áıelder elimizdegi beıbitshilik pen órkendeýdiń ajyramas bólshegi ekenine toqtaldy.
«Memleket basshysy Qasym-Jomart Toqaev Qazaqstannyń árbir azamaty eldegi azamattyq qoǵamdy damytýǵa belsendi túrde atsalysýy tıis ekenin árdaıym aıtady. Bizdiń óńirimizde áıelder analyq mindetterin kásipkerlik pen basshylyq laýazymda, áleýmettik jaýapkershilik pen qaıyrymdylyqta sátti úılestirip júrgenin bilemiz. Áıelderdiń bul kúsh-jigeri bizdiń elimizdiń kelbetin qalyptastyrýda sheshýshi ról atqarady, olardyń qoǵamdyq qyzmettiń ártúrli salalaryndaǵy yqpalyn kórsetedi. Olardyń kóptegen rólderdi qatar ustaı alý qabileti áıelderdiń qoǵamdyq damýǵa qosqan úlesiniń mańyzdylyǵyn kórsete otyryp, basqalarǵa shabyt beredi», dedi Nurlan Noǵaev.
Mańǵystaýda 2023 jyldyń sońyndaǵy málimet boıynsha, áıel kásipkerlerdiń sany ShOB sektorynda 57,9%-dy qurady. Kásipker áıelderdiń kópshiligi bilim berý, densaýlyq saqtaý, óńdeý ónerkásibi, saýda salalarynda kásibin dóńgeletip otyr.
