Alakól men Balqashty basty baılyǵy sanaıtyn jetisýlyqtar jaz bastala qyzý jumysqa kirisip, kún sýyta mımyrt tirligine qaıta oralady. Ala jazdaı shıpaly kóldi jaǵalaǵan aǵaıynnyń ermegi sol. Al kúz kele aıýdaı qalyń uıqynyń qushaǵyna kiredi. Muny biz týrızm salasyna qaratyp aıtyp otyrmyz. Sol sebepti Memleket basshysy Jetisýdy tórt mezgilde de kisi úzilmeıtin álemdik brendke aınaldyrý kerek ekenin jetkizgen. Búginde osy baǵyttaǵy jumystarǵa kóńil súıinedi. Taý týrızmi men ekologııalyq týrızmdi damytýdyń múmkindigi mol Sarqan aýdanynda Vizit ortalyq ashylmaq. Bul úshin Ekiasha aýyldyq okrýgine qarasty Topolevka aýylyndaǵy eski eki mektep ǵımaraty qaıta jańǵyrtylady.
Týrıstik ortalyq úshin Topolevka aýylynyń tańdalyp otyrǵany beker emes. Bul eldi meken – shekaralyq aımaqta ornalasqan taý týrızmi salasyndaǵy áleýeti joǵary aımaq. Osy óńirde «Jońǵar Alataýy» ulttyq tabıǵı parki ornalasqan. Park aýmaǵyndaǵy Jońǵar Alataýynyń baýraıy alma men qyzǵaldaqtyń tarıhı otany ekeni ǵylymı turǵydan dáleldengen. Bul park elimizdegi ulttyq tabıǵı parkter arasynda kólemi jaǵynan ekinshi oryn alady. Oǵan kelýshiler qatary da jyl saıyn artyp keledi.
О́ńir ákiminiń baspasóz qyzmetiniń málimetinshe, 2022 jyly shamamen 2 700 adam kelse, ótken jyly olardyń sany 3 300-ge jetken. Bul jerde 14 myńnan asa gektar aýmaqty alyp jatqan Sıvers alma baǵy da órken jaıǵan. 2017 jyldan bastap Topolevka aýylynda «Sıvers alma aǵashynyń gúldeýi» festıvali turaqty ótkiziledi. О́tken jyly bul is-sharaǵa shamamen 2 myńdaı adam barypty. Jalpy, bul festıval mańyzy jaǵynan Japonııadaǵy Sakýranyń gúldeýi kezeńinen birde-bir kem emes.
Topolevka aýylynan 40 shaqyrym jerde, taý ortasynda Jetisýdyń marjany – Jasyl kól ornalasqan. Teńiz deńgeıinen 1 630 metr bıiktikte ornalasqan Jasyl kóldiń týrıstik áleýetin tıimdi paıdalaný – kún tártibindegi másele. Jergilikti ákimdik Jasyl kóldiń ınfraqurylymyn damytyp, demalýshylardyń kelýine qolaıly jaǵdaı jasaý jumysyn atqarady.
«Vizit ortalyq úshin Topolevka aýylyndaǵy eski mektepter ǵımaratynyń orny belgilengen. Vizit ortalyq Vizit Zhetysu ortalyǵymen tikeleı jumys istep, elimizdiń azamattarynan bólek shetel týrısterine de qyzmet kórsetedi dep josparlanyp otyr. Ortalyq bir ýaqytta 30 demalýshyny qabyldaı alatyn oryn bolmaq. Onyń ǵımaratynda jıyn ótkizý zaly, resepshn, kafe, t.b. qajetti oryndar qarastyrylǵan. 1962 jyly salynǵan, qaıta jańǵyrtýǵa jatatyn eski mektep ǵımarattarynyń jalpy alańy 659 sharshy metrdi quraıdy, al nysandar ornalasqan aýmaq – shamamen 1,4 gektar», deıdi Sarqan aýdanynyń ákimi Ǵalymjan Mamanbaev.
Aýdanǵa arnaıy issaparmen barǵan oblys ákiminiń orynbasary Áset Qanaǵatov eski mektep ǵımarattaryn aýdan ákimdiginiń teńgerimine ótkizý úderisterin jyldamdatýdy tapsyrdy. Bul jumys aıaqtalǵan soń, aýdan ákimdigi qurylys jumysyna qatysty tıisti tehnıkalyq-ekonomıkalyq negizdeme esepterin júrgizbekshi.
Osy rette aıta keteıik, byltyr «Altynemel» ulttyq parki aýmaǵynda jeke ınvestordyń 2 mlrd teńgedeı ınvestısııa quıýynyń nátıjesinde @visit.altynemel vızıt ortalyǵy salynǵan edi. Bul vızıt-ortalyqtyń kafesi bar, Wi-Fi-ǵa qosylǵan, arnaıy kádesyılar da satylady. Mańynda samaljaılary, janýarlardy syrttaı baqylaýǵa arnalǵan sholý munarasy, navıgasııalyq panelder men aqparattyq qalqandar ornatylyp, 10 glempıng salyndy. Sonyń nátıjesinde tabıǵı park, onyń florasy men faýnasy, geologııalyq jáne mádenı-tarıhı kórnekti oryndary, jaıaý júrý marshrýttary bar. Sondaı-aq qaýipsizdik erejeleri týraly tolyq aqparat alyp qana qoımaı, gıd-ekskýrsovodtyń qyzmetine tapsyrys berýge bolady, ekskýrsııaǵa shyǵyp, tipti túnemege qalýǵa da múmkindik jasalǵan.
Al ózimiz «ekinshi Shveısarııa» atap ketken Tekeli qalasynyń taýly aýmaǵy, tumsa tabıǵaty kimdi de bolsa qyzyqtyrary sózsiz. Átteń týrısterge arnalǵan demalys oryndarynyń azdyǵy janǵa batady. Degenmen aldaǵy ýaqytta oblys ákimi Beıbit Isabaevtyń bastamasymen shańǵy-bıatlon kesheni boı kótermek. Bul da – úlken jumys. Atalǵan nysan Tekeli qalasynyń syrtyndaǵy Jońǵar Alataýynyń eteginde ornalasady. Sporttyq keshen qysqy olımpıadalyq sport túrlerin damytýǵa ǵana emes, sondaı-aq taý týrızmine de serpin beredi.
Mono-qala Tekelige demalysqa týrıster negizinen jaz mezgilinde keledi. Al qys jaqyndaǵanda sol demalys aımaqtary kóbine bos turady. Tipti keıbiri jabylyp ta jatyr. Shańǵy-bıatlon kesheniniń qurylysy keń múmkindikterge jol ashady.
«Maǵan taǵy 20 sotyq jer bólindi. Shaǵyn qonaqúı salýdy josparlap otyrmyn. Mundaı jobalar kásipkerlikti damytýǵa múmkindik beredi. Shańǵy-bıatlon kesheniniń ashylýymen biz kóp týrıst keledi dep kútýdemiz, al ol úshin tıisti servıs qajet», deıdi kásipker Ermek Keńeshanuly,
Joba quny 15 mlrd teńgeni quraıdy. Oǵan 9 gektardan asa jer bólingen. Munda birneshe apatty, ıesiz úıler buzylady. Tıisti ınfraqurylym da júrgiziledi. Tekeli qalasynyń sáýlet jáne qurylys bóliminiń basshysy Rústem Bolatulynyń aıtýynsha, jobany ázirleýmen «Astana azamattyq jobasy» aınalyspaq. Bul jobada ákimshilik ǵımarat, sondaı-aq 200 adamǵa arnalǵan qonaqúı salý josparlanyp otyr.
Shańǵy-bıatlon kesheni óńirdegi qysqy olımpıadalyq sport túrleri men taý týrızmin damytýdaǵy zákirlik joba bolyp sanalady. Alakól mańyndaǵy jazǵy týrızmge qajet ınfraqurylymdy júrgizý úshin 60-qa jýyq ınvestısııalyq joba iske asyryldy. Al Balqash kóli jaǵalaýyn abattandyrýǵa úsh jylda 30 mlrd teńgeden asa ınvestısııa baǵyttaý kózdelgen.
Taıaý eki jylda Ortalyq Azııanyń eń bıik sarqyramasy Burhan bulaǵyna aparatyn jol qurylysy bastalady. Onyń uzyndyǵy – 60 shaqyrymǵa jýyq. Jobalyq-smetalyq qujattamany daıyndaýǵa 83 mln teńge bólindi. Osy ıgilikti isterdiń bári Jetisýdy týrızm salasynyń tórine shyǵarady degen oıdamyz.
Jetisý oblysy
