Qarsylas shydatpaǵan Qytaı

Jelesterimiz toptyq týrnırde  Saýd Arabııasy (3:0) men AQSh-ty (3:1) utyp, azýly Anglııa (2:3) men Germanııaǵa (2:3) bir upaı aıyr­mashylyǵymen ǵana ese jiberdi. Osy oraıda qarsylastar komandasynyń namysyn birneshe dúrkin Olımpııa oıyndary, álem jáne qurlyq chempıonattarynyń jeńimpazdary men júldegerleri qorǵaǵanyn aıta ketý kerek. Saqa sportshylarǵa bizdiń jigitter laıyqty qarsylyq kórsete aldy. Sol nátıje arqyly Qazaqstan óz tobynda ekinshi oryn ıelenip, TOP-24 komandanyń qataryna qosyldy.

Kelesi kezeńde 1/8 fınaldyq básekeniń joldamalary sarapqa salyndy. Bul mejede otandas­tarymyz Úndistannyń ústel tennısshilerimen kúsh synasty. Olar – Azııa birinshilikterinde tórt ret júlde alyp, álemdik dodalarda táýir oınap júrgen myqty ujym. Úndi eliniń ókil­­deri byltyrǵy qurlyq chem­pıo­­­natyn úshinshi orynmen qo­rytyndylady. Asa shıelenisti ótken saıysta Qazaqstan qurama­sy óz qarsylastaryna 2:3 ese­bimen ese jiberdi.

Pýsandaǵy jarysta biz Kı­rıll Gerasımenkonyń asqan she­berligine tánti boldyq. Álemdik reıtıngte 40-orynda turǵan 27 jastaǵy Astananyń týmasy toǵyz kezdesýdiń barlyǵynda jeńiske jetip, 100 paıyzdyq kór­setkishke qol jetkizdi. Otan­dasymyz Germanııanyń qos sań­laǵy – Olımpıadada alty (2 kúmis, 4 qola), álem chempıonatynda bes (4 kúmis, 1 qola), Eýropa oıyn­dary (3 altyn), qurlyq chem­pıonaty (10 altyn, 3 kúmis, 2 qola) jáne Álem kýboginde (1 al­tyn, 4 qola) san márte atoı salǵan Dmıtrıı Ovcharov (Germanııa) pen komandalyq saıysta álem chempıonatynyń kúmis júldegeri, jekelegen bá­sekede Eýropanyń úsh dúrkin chempıony, Eýropa oıyndarynyń eki márte jeńimpazy Sıý Dan­nan basym tústi. Sol se­kildi Uly­­­brıtanııanyń oǵlan­da­ry, ko­mandalyq álem chem­pıo­na­ty­nyń qola júldegerleri Pol Drınholl men Lıam Pıtchford jáne AQSh quramasy sapyndaǵy úndistandyq legıonerler Sıd Naresh pen Nıkhıl Kýmardy qa­py qaldyrdy. Rasynda, Kı­rılldiń Pýsandaǵy tabysy talaılardy tamsandyrdy.

Elimizdiń áıelder quramasy Aýstralııadan (3:2) basym tús­k­enimen, kelesi kezeńderde Aýs­­trııa, Gonkong jáne Por­týgalııadan jeńilip, jarysty odan ári jalǵastyra almady.

BAQ ókilderine suhbat bergen Qazaqstan ulttyq quramasynyń bas bapkeri Elmıra Álıeva: «Er­ler quramasynyń basty maqsaty toptyq týrnırden shyǵyp, kelesi kezeńge ótý edi. Ol jospardy oıdaǵydaı júzege asyrdyq. Ná­tıjesinde, bizdiń jigitter jal­py esepte 40 memlekettiń ara­­synda 17-oryndy ıelendi. Ústel tennısshilerimiz bul mejege alǵash ret jetip otyr. Eli­­mizdiń áıelder quramasy Oń­tústik Koreıaǵa anyq aýtsaıder retinde attanǵanymen, Aýs­tralııadan aılasyn asyrdy. Al ózge qarsylastarymyz, shyny kerek, óte myqty boldy. Qorytyndy esepte qyzdar 25-satyǵa turaqtady. Bul da – áıelder quramasynyń álemdik dodadaǵy eń jaqsy kórsetkishi», dedi.

Álem chempıonatynyń al­ǵashqy eki kezeńinen súrinbeı ótken komandalar shırek fınalda jolyqty. Bul mejede Qytaıdyń erler quramasy Japonııany (3:0), Ońtústik Koreıa Danııany (3:1), Fransııa Portýgalııany (3:1) jáne Taıpeı Germanııany (3:0) joldan yǵystyrdy. Jar­tylaı fınalda álemdik reı­tıngtiń kóshbasshylary Ońtústik Koreıany (3:2) ázer utsa, fransýzdar taıpeılikterdi (3:1) tize búktirdi. Fınaldyq saıys­ta Qytaı elinen kelgen sań­laqtardyń mereıi ústem boldy. Olar Fransııany 3:0 esebimen jeńdi. Osylaısha, Qytaıdyń ústel tennısshileri komandalyq álem chempıonatynda qatarynan 10 ret, barlyǵy 22 márte top jardy.

Al áıelder arasyndaǵy ja­rystyń jartylaı fınalynda Qytaı Fransııany (3:0), al Japonııa Gonkongti (3:0) jeńdi. Sóıtip, sary qurlyqtyń qos komandasy bas júldeni ózara saıys­ta sarapqa saldy. Bul báseke bir ǵana upaı aıyrmashylyǵymen Qytaı sportshylarynyń je­ńi­simen aıaqtaldy. Sóıtip, olar da atalǵan jarystyń bas júldesin 22 ret ıelendi.