Foto: scij.kz
Búginde 31 eldiń 3 myńnan astam shańǵyshy jýrnalısi múshesi sanalatyn SCIJ (The Ski Club of International Journalists) klýbynyń negizi 1955 jyly qalanǵan. Osy jyly fransýz Jıl de La Rok jýrnalıster men sportshylar arasyndaǵy saıası qaqtyǵystardyń ýshyqtyrmaý maqsatynda osy klýbty qurady. Dástúrge aınalǵan klýbtyń jyl saıynǵy otyrysy álemniń taý shańǵy kýrortty aımaqtarynda uıymdastyrylyp júr. Dúnıe júziniń 70-ten astam taýly kýrortty kesheninde ótkizilgen otyrys bıyl «Shymbulaq» taý shańǵy kýrortynda bolady. Buǵan deıin Ispanııanyń «Baqueira-Beret», Italııanyń ««Sestriere», Fransııanyń «Val Cenis Vanoise Val d’Arly», Reseıdiń «Roza Hýtor» hám Bolgarııanyń «Pamporovo» syndy kýrortty kesheninde ótti. Byltyr álemniń shańǵyshy jýrnalısteri Kanadanyń áıgili «Marble Mountain» kýrortty keshinde toqaılasqan edi.
«Bul shara bizge paıdaly ma? Paıdaly bolǵanda qandaı, ishki týrızmde túmen jurttyń aldynda sán-saltanatyn kelistire nasıhattap dúıim jurtqa pash etýdiń taptyrmas múmkindigi. Álemniń ár qıyrynan keletin 100-den asa jýrnalıst tek otyrysqa qatysyp qana qoımaı, Qazaqstannyń kórikti mekeni, jaýhary sanalatyn «Shymbulaq» taý shańǵy kýrorty týraly, elimizdiń mádenıeti men ulttyq bolmysy jaıynda óz eline barǵanda aıtady, jaza júredi. Munyń barlyǵy da týrızmniń tamyryna qan júgirteri sózsiz. Bizdiń shańǵyshy jýrnalısterdiń klýby SCIJ uıymyna 2013 jyly qabyldandy. Al elimizde otyrysty ótkizý quqyǵyn 2020 jyly ıelendik. Biraq pandemııaǵa qatysty shegerilip, bıylǵy jylǵa bekitilip otyr. Búgingi tańda bizdiń shańǵyshy jýrnalıster klýbyna 45 BAQ ókili múshe.
Otyrys aıasynda elimizdiń týrızmin damytý jaıy da qozǵalady. 6 naýryzda «Shymbulaq» taý shańǵy kýrortynda shańǵyshy jýrnalıster dodaǵa túsedi. Al 9 naýryz kúni Talǵardaǵy «Alataý» bıatlon kesheninde shańǵymen júgirýden baǵyn synaıdy. Shańǵyshy jýrnalısterdiń beıresmı álem chempıonaty dep te aıtylatyn aıtýly alamanǵa dúnıeniń tórt tarabynan tańdaýly áriptesterimiz qatysady. Elimizdiń atynan synǵa túsetin shańǵyshy-jýrnalısterimiz de daıyndyqty údetip keledi», dedi SCIJ Qazaqstan klýbynyń prezıdenti Irına Bajenova.
