Sýretterdi túsirgen – Erlan OMAR, «EQ»
Ult mádenıetiniń altyn sáýlesi onyń zergerlik ónerinen aıryqsha kórinedi. Asqan sheberlikti talap etetin zergerlik buıymdardan halyqtyń tarıhy men tanymyn, dástúri men dáýirin baǵamdaı alamyz. Saq babanyń saýyty men saýsaǵyndaǵy buıymdar sonaý ǵasyrdan búginge aman jetip, jańaryp, túrlenip, halqymyzdyń sánine saltanat qosyp keledi. «Taqqanym qulaǵyma kúmis syrǵa, kúmbirletip shyǵamyn kúnde qyrǵa» degen qara óleń shýmaqtary joǵarydaǵy oıymyzdy qýattap tur. Kórmeni uıymdastyrýshylar zergerlik óner arqyly elimizdiń baı dástúri men tarıhyn tanystyryp, atalǵan ónerdi kópshilikke nasıhattaýdy maqsat etken.
Saltanatty sharanyń alǵashqy quttyqtaý sózin Mádenıet jáne aqparat mınıstrligi Mýzeı qyzmeti jáne materıaldyq emes mádenı mura basqarmasynyń basshysy Gúlzeınep Pazylova jetkizdi. «Ulystyń uly kúni – Naýryzdyń onkúndigi osyndaı keremet kórmeniń ashylýymen bastalyp otyr. Mundaı kórmeler arqyly qazaqtyń bolmysyn tanytatyn týyndylardan órisimiz keńeıip, tanymymyz tolyǵa túseri anyq», dedi ol.
Sýretshi, etnograf Qalıolla Ahmetjan kórmeniń rýhanı mańyzdylyǵyna toqtalyp, zergerlik buıymdardyń kórkemóner úlgisi ǵana emes, halqymyzdyń dúnıetanymy, nanym-senimi, ádet-ǵurpy men tarıhy kórinis tapqan qundylyǵy joǵary mura ekenin atap ótti. Sonymen qatar Q.Ahmetjan ulttyq mýzeı tarapynan qolóner úlgilerin kórsetip qana qoımaı, olardy ǵylymı turǵyda zerttep-zerdelep jatqany – memleketimiz jarqyn bolashaǵyna bastama ekenin basa aıtty.
Mýzeıdegi qordy esepke alý bóliminiń jetekshisi ári kórmeniń kýratory Toǵjan Ádilbekova bolsa, qazaq halqynyń qyz balany tárbıeleý jáne ony sán-saltanatymen ósirý jaıynda oı sabaqtady. Quttyqtaý sózderden keıin kórme qonaqtary nazaryna ulttyq áshekeı buıymdarynan defıle usynyldy. Defıle barysynda moıyn-samaı áshekeıleri, syrǵalar, bilezikter, júzikter, burym áshekeıleri sııaqty buıymdar kórsetildi. Áıel zatynyń jas erekshelikteri, qoǵamdaǵy mártebesine saı sán úlgisi tanystyryldy.
I.Tasmaǵambetovtiń bul kolleksııasy bas-aıaǵy 1382 buıymnan turady. Budan bólek mýzeı qorynda Bolat Sarybaevtyń jeke kolleksııasy saqtalǵan. Onda úsh júzden asa mýzykalyq aspap jınaqtalǵan.
