1953 jyl 1 aqpanynyń túninde úsh kúnnen beri týlaǵan sý tasqyny saǵatyna 150 km jyldamdyqpen bir mezette 50 bógettiń tas-talqanyn shyǵardy. Al tańǵa jýyq 133 eldi mekendi sý alyp úlgerdi. Apattan 72 myń turǵyn evakýasııalanǵanymen, 1835 adam opat boldy. Tasqynǵa – tosqyn qoıýǵa Nıderlandqa dúnıejúzi qolushyn sozdy.
1953 jyldyń bul tragedııasy halyqty sý tasqynynan qorǵaıtyn jańa ınjenerlik jobalardyń jasalýyna sebep boldy. Solardyń eń bastysy ári eń aýqymdysy – «Delta» bógeti. Onyń negizgi uzyndyǵy 2,5 myń shaqyrym bolsa, kómekshi bógetter 13 myń shyqyrymdy quraıdy. Bógetterdiń kóbi teńiz tynysh kezinde ashyq turady. Al daýyl turyp, sý deńgeıi kóterile bastaǵanda avtomatty júıe dabyl qaǵyp, dambalar jabylady. Osy arqyly eldi tasqynnan qorǵaıdy. Bir qyzyǵy, bógetter jel energııasy arqyly jumys jasaıdy.
«Delta» júıesiniń basqa bógetterden bir aıyrmashylyǵy – ınjenerler ony qajet kezinde teńiz kemeleri de óte alatyndaı etip salǵan. Sebebi teńizben jalǵasyp jatqan Sheldt ózeni birjola tuıyqtalyp qalsa, onda ol ýaqyt óte kele tushy sýǵa aınalady. Bul jergilikti ekojúıege, sonyń ishinde balyq ónerkásibine teris áser etetin kórinedi.
Amerıkalyq ınjenerler qaýymdastyǵy «Delta» júıesin qazirgi álemniń jeti keremetiniń qataryna qosqan.
