Gúldeıtin shaqta baq basy,
Jaryldy sordyń soqtasy...
Qamyrsha ılep barady,
Kórinbeı qaldy at basy,
Baǵýsyz qaldy baqtashy.
Qaımana jurttyń qaqpasyn,
Qaqpashy sýdyń patshasy!
Erneýiń kenet kerildi,
Búktirdiń bekem belimdi.
Suraýy baryn uqtyrdyń,
Sýmenen býyp jerimdi.
Etekten nege keshtirdiń,
Beıneti qalyń elimdi?
Patshasy sýdyń — Súleımen,
Kóńiliń neden jerindi?
Nýyńdy ketken baltalap,
Sýyńdy etken nantalap,
Muraptan kóńiliń qaldy ma?
Ot-jalynǵa orap ormandy,
At jaly bólgen bar maldy,
Adamnan kóńiliń qaldy ma?
Botadaı kózdi, súıikti,
Qynadaı qyrǵan kıikti,
Qos aıaqty, ıyqty,
Ańdardan kóńiliń qaldy ma?
Qan qaqsatqan elimdi,
Teńine berip telimdi,
Saýdaǵa salǵan jerimdi,
Jemirden kóńiliń qaldy ma?
Barymtalaǵan tilimdi,
Aryn talaǵan dilińdi,
Aramzalaǵan dinińdi,
Dúmsheden kóńiliń qaldy ma?
Taramda, taram, taramda,
Kórmegenimniń bári alda.
Synaq qoı bul da adamǵa,
Keshirgin, Qudaı, Jasaǵan!
Úıirsek boldyq jamanǵa.
Tilazar bolǵan balańdy...
Asqynyp ketken sanańdy,
Alastap sýmen alam ba?
Arýana baýyr dúnıe,
Shaıqalyp ketti sharamda.
Sýyńdy basta, Súleımen,
Arnasaı deıtin arnaǵa,
Arnasy qashqan Aralǵa!
Aıaqtyń asty jar ma eken,
Taıaqtyń basy tal ma eken,
Qazanym qalqyp barady,
Astynda oty bar ma eken?
Shildede, qazan, aqpanda,
Armanymdy aıttym aq tańǵa!
Omalyp qalaı otyram?
«Otanym jylap jatqanda...»
Alladan medet tileımin,
Babama baryp túneımin.
«Bul da óter...»
Áli-aq túleımin!
Sabyr bere gór halyqqa
... Saqınań qaıda, Súleımen?
Halqymnyń sory qalyń-aq…
Qalmasyn sábı ańyrap,
Aqpasyn sýda tórt túlik,
Aqpasyn sýda shańyraq!
Áýmın!
Janarbek ÁShIMJAN,
aqyn
