Naryq tetikteriniń álsizdigi bolar, kórshi eldiń sapasyz astyǵy bizdiń naryǵymyzdy erkin bılep-tóstep aldy. Pavlodar oblysy boıynsha ekonomıkalyq tergep-tekserý departamenti eń qaýipti ári kúdikti qarjylyq operasııalardy taldaı kelip, 30 qylmystyq quqyq buzýshylyqty anyqtaǵan. Bul zań buzýshylyqtar boıynsha qylmystyq jaýapkershilik Qylmystyq kodekstiń 216-babynda aıqyn kórsetilgen. Keltirilgen zalal 6 mıllıard teńgeden asqan. Onyń 300 mıllıon teńgesi tergeý úderisteri kezinde óteldi.
Zańsyz astyq ımporty boıynsha óńirdegi sharýa qojalyqtaryna qatysty 12 qylmystyq is tirkelgen. Onyń ishinde memleketke 4,1 mlrd teńge zalal keltirgen 10 qylmystyq is sotta qaraldy.
– Kórshiles memleketterde, atap aıtqanda, Reseıde óndirilgen astyqty úlken kólemde elge ákelip, jalǵan shot-faktýralar jasaý arqyly Taıaý Shyǵys elderine otandyq ónim retinde eksportqa shyǵaryp jatqandar anyqtaldy. Olar ónimdi kóbine Aýǵanstan, Iran, Tájikstan sııaqty memleketterge jiberedi. Bul bizdiń otandyq ekonomıkamyzǵa, óńirimizdiń sharýa qojalyqtaryna aıtarlyqtaı zııan keltirip otyr. О́zimizdiń ónimderimiz shetelge shyqpaı qalady nemese satylǵan kúnde de baǵasy tómendep ketedi. Sondyqtan da mundaı zańsyz is-áreketter bizdiń ulttyq ekonomıkamyzǵa úlken zalal keltiredi, – deıdi Pavlodar oblysy boıynsha ekonomıkalyq tergep-tekserý departamentiniń basshysy Erik Esenov.
Oblystaǵy kúlbilteli problemalardyń biri – zańsyz astyq ımporty. Bul rette sharýa qojalyqtaryna qatysty 12 qylmystyq is tirkelgen. Onyń ishinde memleketke 4,1 mlrd teńge zalal keltirgen 10 qylmystyq is sotqa joldanyp, qaraldy.
Atap aıtqanda, olardyń biri – «Ertis» sharýa qojalyǵy. Basshysy jalǵan shot-faktýralar jasaý esebinen 50 mıllıon teńgege jýyq kiris tapqan. Ol bul qarajatqa «Toyota Camry» avtokóligi men Pavlodardaǵy elıtalyq turǵyn úı kesheninen páter satyp alǵan. Sharýa qojalyǵy basshysy úsh jylǵa bas bostandyǵynan aırylyp, múlki tárkilendi.
Taǵy bir kásiporyn – «Vostok» JK ókilderi bir jarym jylǵa bas bostandyǵynan aıyryldy. Olar «Damas» ShQ, «Dııar», «Altyn Bıdaı», «Sever», «Ansar» JK jáne «Ansar_ANSAR» JShS-lary úshin dándi jáne dándi-burshaqty daqyldar boıynsha jalǵan shot-faktýralar daıyndap otyrǵan. Qylmystyq tabys somasy 50 mıllıon teńgeni quraǵan.
Pavlodar oblysy
