«Gejýba Shıeli sement kompanııasy» JShS – elimiz ben Qytaı Halyq Respýblıkasynyń birlesken jáne ındýstrııalandyrý kartasyna engen Syrdaǵy iri jobalardyń biri. Osydan 6 jyl buryn ındýstrııalyq-ınnovasııalyq damý baǵdarlamasy aıasynda uıymdastyrylǵan jalpyulttyq telekópirde iske qosylǵan óndiris ornynyń jobalyq quny – 64 mlrd teńge. Qazir jylyna 1 mln tonnadan astam ónim shyǵaryp otyr.
Jobaǵa memlekettik qoldaý sharalary retinde ındýstrıaldy aımaqtan 46 gektar, jataqhana salý úshin 4 gektar jer telimi tabystalǵan. Qurylystan bólek, munaı, gaz, ýran uńǵymalarynda keńinen qoldanylatyn tamponajdy sement óndirisi óńirde osylaı bastaý aldy.
«Kompanııa túrli ınvestısııalyq jeńildikterdi paıdalandy. Investısııalyq kelisimshartqa otyrý arqyly qurylǵylardy alyp kelýde baj salyǵynan, aıaqqa turyp ketkenshe korporatıvtik tabys salyǵynan, jer jáne múlik salyǵynan bosatyldy. Kásiporyn aýdandarda da iri jobalardy júzege asyrýǵa bolatynyn kórsetti. Alǵashqy ónimin shyǵarǵannan bastap irkilissiz jumys istep kele jatqan zaýyt aımaqty tolyq qamtamasyz etip otyr. Birneshe óńir zaýyt ónimine jıi suranys jiberedi», deıdi «Kazakh Invest» UK» AQ óńirlik fılıalynyń basshysy Murat Balabaev.
«Gejýba Shıeli sement kompanııasy» JShS ónimin tutynýshylar qataryna 2019 jyldan beri О́zbekstan memleketi de qosyldy. О́ndiris orny jylyna osy elge shamamen 300 myń tonna ónim eksporttaıdy. Bul elimizdegi sement eksportynyń 20 paıyzy eken.
Zaýyttyń Shıeliden boı kóterýiniń bir sebebi – aýdandaǵy ken oryndarynda óndiriske qajetti qum, dolomıt, ák tasy men ýaqtalǵan qıyrshyq tas shyǵarylady. Sementke qajetti arnaıy qospalar ǵana syrttan tasymaldanyp otyr. Qaldyqtardyń qorshaǵan ortaǵa áserin azaıtý úshin bólinetin kómirqyshqyl gazy arnaıy súzgiden ótip, tazartylady.
Seriktestik alǵashqy jyldary jergilikti azamattardy Qytaıda oqytý arqyly jumysshylar daıarlaýǵa den qoıǵan. Qazir solar túrli qondyrǵynyń tilin biletin mamanǵa aınaldy. Osy kúni 260 turaqty jumys ornyndaǵy 220 jumysshy – el azamattary. Merdiger mekemelerdi qosqanda zaýyt bas-aıaǵy 400-deı adamdy jumyspen qamtyp otyr. Ortasha jalaqy mólsheri 250 myń teńgeden asady.
Zaýyt tek jergilikti halyqty jumyspen qamtyp qoımaı, aýyl turǵyndaryna kómek berip turady. Indet irgege jetip, balalar qashyqtan oqı bastaǵan ýaqytta kompanııa oqýshylarǵa 150-den astam planshet alyp berdi. Shıeli jurtyna «Jedel járdem» kóligi men ınvataksı syıǵa tartty. Ár qysta áleýmettik jaǵdaıy tómen otbasylarǵa kómir, azyq-túlik jetkizip beredi.
Byltyr 1 100 000 tonna sement óndirgen seriktestik bıyl da qarqyndy tómendetpek emes. Jumys isteı bastaǵaly beri jergilikti jáne respýblıkalyq bıýdjetterge 12 mlrd teńgege jýyq salyq túsirgen kásiporyn sapaǵa basa mán beredi. Osydan da búginde Shıeli sementi suranysqa ıe ónimge aınalyp otyr.
Qyzylorda oblysy,
Shıeli aýdany
