Qujatta irgeli bastama, júıeli usynys, naqty tapsyrma 9 strategııalyq baǵyt aıasynda baıyptalǵan. Bul rette aqsha-nesıe men fıskaldy saıasat arasyndaǵy úılesimsizdikti joıý, ınvestısııa men bıznestegi jaǵdaıdy retteý, ónerkásip áleýetin ornyqty júıeleý, ınfraqurylym zárýlikterin sheshý, qat mamandardy ekonomıka qýatyna aınaldyrý, ult salamattylyǵyn shyńdaıtyn keshendi sharalar, áleýmettik qoldaý salasyn serpiltý, ekologııalyq jaýapkershilikti arttyrý, memlekettik basqarý isin jetildirý, zań men tártip qaǵıdatyn sapalandyrý jan-jaqty zerdelendi. Eń bastysy, ekonomıkaǵa qan júgirtetin baǵyttardyń zańnamalaryn qaıta qaraý, naqtylaý, ózektendirý úderisine qatysty tapsyrma berildi. Ásirese shaǵyn jáne orta bıznestiń tynysyn ashý, qaıtarymy mol aýyl sharýashylyǵy salasyn qarjylandyrý, banktiń ekonomıkalyq jaýapkershiligin úılestirý, salyq saıasatyna jańasha kózqaras pen bıýdjet tapshylyǵyn júıeleıtin is-shara aıqyndaldy. Osy oraıda zańdyq tetikterdi daıarlaýǵa qatysty naqty tapsyrma berildi. Ulttyq qor qarajatyn retimen paıdalaný, orta taptyń áleýeti men salmaǵyn arttyrýǵa baılanysty ustanym da ózekti. Munyń bári, Prezıdent aıtqandaı, «elimizdiń turaqty damýyna múmkindik beretin jańa tetikter».
Qarjy men ınvestısııanyń syrtqy hám ishki túrli faktorǵa baılanysty qıly deńgeıi – qalypty jaǵdaı. Onyń bılik pen qoǵamǵa qatysty ólshemi – ádilettik, tártip jáne únem. Muny el basshysy «bıýdjet qarajatyn strategııalyq mańyzy joq, asa shuǵyl emes sharýalarǵa ońdy-soldy shashýdy doǵarý kerek» dep qadap aıtty. Jeke ınvestısııa men salyq saıasaty arasyndaǵy úılesimniń, memleketttik-jekemenshik áriptestiktiń sapa men parasatqa qurylýy – ekonomıka damýynyń eleýli baǵyty ekeni de saraptaldy. Agrosalany sýbsıdııalaýdan góri tıimdi nesıe berý tyǵyryqtan shyǵaratyny da oıǵa salyndy.
Joldaýda zańsyzdyqqa barǵan atqarýshy bılik oryndary men kóterem bıznes salasyna syn da aıtyldy. Mysaly, «sanda bar, sanatta joq» 2 mln iri qara men 3 mln usaq mal jyry. Nemese jekemenshik jerlerinen myńdaǵan shaqyrym qashyqta turatyn elirme «jer ıeleri» jaıy. Bul másele zań turǵysynan qaralatyny málim boldy.
О́zderińizge málim, O.Bektenov basqaratyn el Úkimeti ónerkásipke baılanysty 17 iri jobany júzege asyrýǵa jumylyp otyr. Buǵan monoqalanyń tyń óndirisinen bastap, munaı-gaz salasyn serpiltýge deıingi ınnovasııalyq bastamalar engen. Sóz ben is birliginiń synalatyn kezeńi – tap osy jer. Halyq úkimet jumysy nátıjesine qarap baǵa bereri sózsiz.
Memleketimizdiń ınfraqurylymyn damytý – dilgir basymdyq. Bul jerde zamanaýı energııa óndiretin qýat kózderin oraıly paıdalaný – ǵylym men bilikke qatysty shart. AES – tehnologııa men ınnovasııanyń, báseke men tájirıbeniń kórsetkishi. Dál osy máselede biz elimiz utatyn joldy tańdaýǵa tıispiz. Prezıdent ınfraqurylymǵa qatysty kólik-logıstıka jaıyna da toqtaldy. Keıingi urpaqqa sapaly avto, temir, áýe, teńiz joldaryn, beketterin qaldyrý mindetin eske saldy. Árıne, jospar bar da, ony oryndaý bar. Onyń tetigi – qoǵamdyq baqylaý men sıfrlyq platforma ekeni naqtylandy.
Memleket basshysy qoǵamnyń berekesi adal eńbekpen jáne tııanaqty tártippen ornaıtynyn árqashan eske salady. Joldaýda 2025 jyldy – jumysshy mamandyqtary jyly dep jarııalady. Bul – dástúrge taban tiregen oı. Injener, geolog, kenshi, agronom, zootehnık, avtotehnık, melıorator t.b. mamandardyń mártebesin kóterý, ǵalym men ónertapqysh ıdeıasyna qulaq asý – óser eldiń isi. Buıyrsa, osy baǵytta ıgi bastamalar júzege asady dep úmittenemiz.
Joldaýda Prezıdent «Ustazdar – ulttyń zııatkerlik qýaty» degen tyń oı aıtty. Dál osyny biz keń maǵynada túsingenimiz jón. Alash tulǵasy Ahmet Baıtursynulynyń shákirtterine aıtqan eń sońǵy amanaty – «Aınalaıyndar, muǵalim bolyńdar!» degen bata eken. Bul sózdiń astarynda elge jaýapty bolý mindeti tur. Dál solaı búgin ár salanyń dástúri men tájirıbesi jańashyl táýekeline jol kórsetkeni abzal.
Memleket basshysy ekologııalyq jańarý men qoǵamdyq tártip qundylyǵy mańyzyna toqtaldy. Rasynda, biz «Taza Qazaqstan» aksııasyn sana, is tazalyǵy deńgeıine kóterýimiz qajet. Al Prezıdent ádildik pen qaýipsizdik aıasynda sóz etken áskerdi – memlekettik til men birlik dástúrin tabıǵı sińiretin erler mektebine aınaldyra bilýimiz kerek. «Ár is elge degen janashyrlyq nıetpen jasalsyn!» degen Joldaý túıininen osyny uqtyq.
