Kollajdy jasaǵan – Záýresh Smaǵul, «EQ»
«Eýrazııalyq bank»
«Eýrazııalyq bank» baspasóz qyzmetiniń habarlaýynsha, bank 2023 jyly bólshek sektorda da, korporatıvti sektorda da nesıe portfeli jóninen oń dınamıkany saqtap qalǵan.
«Bir jylda nesıe portfeli 36%-ǵa (korporatıvti sektorda – 55%-ǵa, bólshek sektorda 30%-ǵa) ósti. Depozıt mólsherlemesiniń joǵary bolýy jeke tulǵalar qarajatynyń byltyr 22%-ǵa artýyna áser etti», deıdi.
Bul qarjy ınstıtýty jeke marketpleıs qurýdy emes, BaaS (Software as a Service) modeli negizinde seriktestik ornatýdy jón dep tapqan. Iаǵnı saýda jelisi, iri elektronıka dúkeni, avtosalondarmen seriktestik ornatady.
«Banktegi sıfrlandyrý deńgeıi joǵary. Barlyq ónim onlaın rejimde qoljetimdi. FOREX-te eksklıýzıvti baǵammen valıýtalyq operasııalar jasaý múmkindigin oılastyryp jatyrmyz. Sonymen qatar qoljetimdi bank qyzmetteri árdaıym jańa sheshimdermen tolyǵady. Máselen, «Qazaqstan turǵyn úı kompanııasymen» jasandy ıntellektini paıdalana otyryp jańa baqylaý tetigin engizdik, sonyń negizinde úlesker ózi alǵysy keletin úıdiń qurylysyn baqylaıdy. Qarjynyń maqsatty jumsalýyn, kez kelgen jospardan tys áreketti, qarjylyq model men smetany qadaǵalaýǵa bolady», delinedi bizge usynǵan jaýapta.
Bank – AQR-diń de turaqty qatysýshysy. Aıtýlarynsha, 2023 jyldyń qorytyndysy negizinde jarııalanǵan nátıjede bank kórsetkishi naryqtyń jalpy kórsetkishinen asyp túsken.
«Bankte kapıtaldyń aıtarlyqtaı qory bar, ol qor byltyr bir jarym ese ósti. Bank klımattyq stress-testileý ótkizýge de daıyn. Banktiń nesıe portfeli sapasynyń da joǵary bolýyn jyl saıynǵy AQR qorytyndysy rastap beredi. 2023 jyl qorytyndysynda NPL90+ úlesi 4,19%-ǵa tómendedi», deıdi.
«Nurbank»
«Nurbank» baspasóz qyzmetiniń málimdeýinshe, byltyrǵy taza paıda 7,7 mlrd teńgeden asyp tústi (2022 jylmen salystyrǵanda 36,9%-ǵa artyq). 2023 jyldyń sońynda kredıt qorjyny 300,9 mlrd teńgege (brýtto) deıin ósken.
«Bankte jetkilikti kapıtal men ótimdilik rezervteri bar. 2024 jyldyń basynda banktiń menshikti kapıtalynyń jetkiliktilik deńgeıi 10%-dyq normatıvpen 24,8%-dy, 30%-dyq normatıvpen aǵymdaǵy ótimdilik mólsheri 234%-dy qurady. Bul qarjylyq kórsetkishter banktiń turaqtylyǵyn rastaıdy. Joǵary bazalyq mólsherleme áli de qarjylandyrý qunyna qatty áser etedi», dep jaýap beredi bank baspasóz qyzmeti.
Bul banktiń de jeke marketpleısi joq. Ekinshi jartyjyldyqtaǵy basym maqsatynyń biri – ónimderdi berý retin avtomattandyrýdy arttyrý.
«Qaǵazbastylyqty barynsha azaıtyp, bank bólimshelerimen klıenttiń ózara áreketin qysqartqymyz keledi. Bank basshylyǵy «sıfrlyq qyzmetterdi, sondaı-aq qoldanystaǵy tetikterdi jańǵyrtýǵa múmkindik beretin birqatar sheshim qabyldady. О́zgerister ShOB-qa, bólshek bızneske, tranzaksııalyq bızneske áser etedi. Sondaı-aq qazir AHQO, sıfrlyq aktıvter bırjalarymen jáne blokcheın ındýstrııasynyń ókilderimen ózara yntymaqtasyp jatyrmyz. 2023 jyly elektrondy aqsha shyǵardyq. Bul «Nurbank»-ke tehnologııalyq banktik servısterdi engizý naryǵyndaǵy kóshbasshylardyń qataryna qosylýǵa múmkindik berdi. Jaqynda «Nurbank» pen «Ataix Eurasia» krıptovalıýta bırjasy otandyq naryqta alǵash ret zańdy tulǵalarǵa (sıfrlyq maınerler, brokerler, ınvestısııalyq qorlar) fıat balanstarynan qarajat alý servısin birlesip iske qosty. Bul servıs bizge bank retinde krıptobırjadan ótinimderdi avtomattandyrylǵan qabyldaý men bankishilik úderisterdi avtomattandyrý esebinen krıptobırja men zańdy tulǵa arasyndaǵy esep aıyrysýdy múmkindiginshe tezirek júzege asyrýǵa jaǵdaı jasaıdy», deıdi.
2019 jyly júrgizilgen AQR nátıjesinde «Nurbank» qarjylyq turaqtylyqty jaqsartý baǵdarlamasyna enip, nátıjesinde 2020 jyldyń sáýir aıynda 46,8 mlrd teńge somasyna rettelgen oblıgasııalardy ornalastyrý múmkindigi týǵan. Bank bul qarajatty ekonomıkanyń naqty sektoryna nesıe berý baǵytynda paıdalanypty.
«2020 jyldyń mamyr aıynda «Nurbank»-tiń iri aksıoneri 20,038 mlrd teńge somasynda qosymsha kapıtaldandyrýdy aıaqtady, bul qarjy ınstıtýtynyń turaqtylyǵyn arttyrýǵa múmkindik berdi. Shyǵarý prospektisine sáıkes sýbsıdııalanatyn oblıgasııalardy óteý merzimi 15 jyldy quraıdy. Oblıgasııalardy óteý prospektiniń sharttaryna sáıkes júzege asyrylady. Qazir bank klımattyq stress-testileýdi baǵalaý úderisin bastady. Aldyn ala málimetterge qarasaq, ótken eseptilik kezeńde berilgen kredıttegi kómirtegi shyǵarylýyna baılanysty kredıtteý úlesi nebári 20,9%-dy qurady», deıdi.
«Freedom Bank»
«Freedom Bank»-tiń bizge usynǵan aqparatyna súıensek, birinshi jartyjyldyqta bank aktıvi 5%-ǵa nemese 2,3 trln teńgege deıin ósti.
«Banktiń boljamdy taza paıdasy shamamen 26 mlrd teńgeni quraýy múmkin. 2022 jyldan bastap bank nesıe portfeliniń kólemin serpindi túrde arttyryp, 2024 jyldyń basynda jetkilikti kólemdi portfeldi qalyptastyrdy. О́tken jyly bank shaǵyn jáne orta bıznesti damytýǵa, sondaı-aq qysqa merzimde jeke jáne zańdy tulǵalarmen seriktestik qatynas qurýǵa múmkindik beretin ishki bıznes-úderisterdi jetildirdi. Halyqqa usynylatyn túsinikti, ashyq ári alýǵa yńǵaıly qarjylyq qyzmetterdi tanymal etýdiń arqasynda paıda artyp, nesıe portfeli 2 ese (320 mlrd-qa) ulǵaıdy», deıdi.
Bul qarjy ınstıtýty naryqta ózin sıfrlyq ónimder men qyzmetterdi usynýǵa mamandandyrylǵan data-driven banki retinde kórsetip júr. 2021 jyly bank ıpotekalyq nesıe alýdy sıfrlandyrdy jáne álemdegi alǵashqy sıfrlyq ıpotekany iske qosty.
«Biraz ýaqyt óte Qazaqstandaǵy alǵashqy ınvestor «Invest card» kartasyn, basqa da birqatar sıfrlyq kartany ‒ «Freedom card» mýltıvalıýtalyq kartasyn, «Freepay» kredıttik lımıti bar qaryzdardy óteý kartasyn shyǵardy. 2022 jyly «7-20-25» memlekettik baǵdarlamasy negizinde sıfrlyq ıpotekany, sıfrlyq avtonesıeni jáne bólip-bólip satý múmkindigi men overdrafty bar JK-ge arnalǵan «Freedom box» keshendi sheshimin iske qosty. 2023 jyly óz baǵdarlamasy jáne «Damý» memlekettik baǵdarlamasy aıasynda bıznestiń bank bólimshelerine barmaı-aq sıfrlyq nesıe alý múmkindigin jarııa etti. Qazir barlyq zańdy tulǵaǵa qyzmet kórsetýdi tolyǵymen sıfrlandyrý maqsatynda keıbir ishki úderisterdi rettep jatyr», deıdi.
Bıyl sáýir aıynda iske qosylǵan SuperAPP mobıldi qosymshasy sıfrlyq marketpleıstiń analogi retinde áreket etedi, onda barlyq negizgi ónim jınaqtalǵan. Qosymshada onlaın rejimde bank kartasyn ashýǵa, depozıt ashýǵa, aýdarymdy (ishki aýdarym, bankaralyq aýdarym) júzege asyrýǵa, nesıeni resimdeýge (jyljymaıtyn múlik satyp alýǵa, avtokólik satyp alýǵa), nesıeden keıingi qyzmet kórsetýge qatysty is-sharalar ótkizýge (anyqtamalar qalyptastyrýǵa, ishinara óteýge, qaıta qurylymdaýǵa ótinim berýge), túrli qyzmetke (kommýnaldyq tólem, salyq, aıyppul, uıaly telefon tólemderi) aqy tóleýge múmkindik bar. Bul bank te AQR perımetrine kiredi.
«Bank RBK»
«Bank RBK»-nyń nesıe portfeli jyl basynan beri 8%-ǵa ósken. Bıyl birinshi toqsandaǵy taza tabysy – 12 224 mln teńge.
«Taza paıda ótken jyldyń uqsas kezeńimen salystyrǵanda 1 708 mln teńgege nemese 16,2%-ǵa ósti. Aktıv quny 1 956 mlrd teńgege jetti (2024 jyldyń 1 sáýirindegi jaǵdaı). О́sim – 13,3%. Jeke tulǵalar men zańdy tulǵalardyń salymy 1 277 mlrd teńge boldy. Qaryz portfeli 2023 jyldyń 1 sáýirimen salystyrǵanda 350 mlrd teńgege ulǵaıdy. Esepke sáıkes, bank byltyr 49,5 mlrd teńge kiris aldy. Bul – 2022 jylǵydan 34%-ǵa joǵary kórsetkish.
Bul bank óziniń «My RBK» mobıldi qosymshasyn udaıy jetildirip otyrýǵa kóńil bóledi.
«Qazirgi ýaqytta mobıldi qosymshada 2 myńnan astam ártúrli qyzmet qoljetimdi. Qosymshada depozıt ashý, nesıe alý, aýdarym jasaý (shetelge de), áýe bıletin, konsert pen sporttyq is-sharalarǵa bılet satyp alý, memlekettik qyzmetti tutyný, páteraqyny tóleý sııaqty qyzmetter bar. Sonymen birge qazir ártúrli seriktespen 5 jobany júzege asyryp jatyrmyz. Olar óz qosymshalarynda bank servısterin qoldanyp otyr. Bul – atalǵan baǵyttaǵy ekinshi deńgeıli bankter arasyndaǵy absolıýtti rekord», dep jaýap berdi.
