Elimiz Eýropa elderimen mádenı-gýmanıtarlyq yntymaqtastyqty nyǵaıtýǵa kóp kóńil bólip keledi. Bul saladaǵy ózara is-qımyldyń mańyzdy baǵyttarynyń biri – tarıhı-mádenı murany dáripteý.
Qorynda elimizdiń birneshe mádenı jádigeri bar, Azııa óneriniń álemdegi eń tolyq, Eýropa aımaǵyndaǵy eń iri kolleksııalary saqtalǵan Gıme – Azııa óneriniń ulttyq mýzeıinde Qazaqstannyń tarıhı murasynan kórme ótkizý óner álemindegi eleýli oqıǵa bolatyny anyq.
Atalǵan kórme mýzeı jádigerlerin ımmersıvti tehnologııalardyń súıemeldeýimen qazaq memlekettiliginiń ǵasyrlar boıy damýynyń tarıhı-órkenıetti bastaýlaryna, qazaq halqynyń mádenı kodynyń sabaqtastyǵy men biregeıligine erekshe nazar aýdartady. Sondaı-aq Eýropa jáne fransýz jurtshylyǵyna Qazaqstan mádenıetiniń kópǵasyrlyq tarıhy men baı qazynasyn kórsetýdi maqsat etedi.
Ekspozısııada el tarıhynyń negizgi kezeńderin (b.z.d. III myńjyldyqtan XVIII ǵasyrǵa deıin) sıpattaıtyn 35 sırek artefakt usynylǵan.
Ekspozısııa 5 bólimnen turady. Atap aıtsaq, «Tobyl oıshyly, Botaı mádenıeti jáne jylqyny qolǵa úıretý», «Altyn Adam. Alǵashqy saq memleketteriniń paıda bolýy», «Tas músin (Balbal). Túrki bıligi kezeńindegi ortaǵasyrlyq Qazaqstan», «Qoja Ahmet Iаsaýı kesenesiniń shyraǵdandary. Islamnyń damýy», «Qazybek bıdiń shapany. Qazaq handyǵy jáne búgingi Qazaqstannyń paıda bolýy».
Ashylý saltanatyna Qazaqstan men Fransııanyń kórnekti memlekettik saıası qaıratkerleri, dıplomatııalyq korpýs, mádenıet jáne óner ókilderi, ǵylymı jáne stýdenttik qoǵamdastyq, Eýropadaǵy qazaq dıasporasy ókilderi qatysady.
Aıta keteıik, kórme kelesi jyldyń 24 naýryzyna deıin jalǵasady.
