Sýret: gov.kz
J.Asanov О́zbekstannyń Ortalyq saılaý komıssııasynyń daıyndyǵyn joǵary baǵalady jáne ashyq ári rásimi rettelgen saılaý ótkizýge eleýli úles qosqanyn atap ótti. Onyń aıtýynsha, saılaýdy uıymdastyrý men tehnıkalyq qoldaý deńgeıiniń joǵary bolýy saılaý zańnamasy jáne saılaý ótkizý standarttaryn saqtaýǵa erekshe mán berilgenin kórsetedi.
Depýtat daýys berý jáne daýysty sanaý rásimderiniń ashyqtyǵymen qosa, saılaý úderisi kezeńderinde barlyq zańnama erejesin ustanýǵa erekshe nazar aýdardy. О́zbekstandaǵy demokratııa men saıası turaqtylyqty nyǵaıtýdaǵy mańyzdy qadam bolǵany jáne ekijaqty qatynastardyń damýy men baýyrlas elder arasyndaǵy jalpy senim ahýalyna oń áseri atap ótildi.
J.Asanov baıqaý qorytyndysy boıynsha О́zbekstandaǵy saılaý ınstıtýttarynyń odan ári damýyna senim bildirip, demokratııa úderisterin nyǵaıtý eldiń turaqtylyǵy men órkendeýine berik negiz bolatynyn atap ótti. Osyndaı baıqaý mıssııalary Qazaqstan men О́zbekstannyń memlekettik ınstıtýttary arasyndaǵy áriptestik qatynasty tereńdetýge jáne tájirıbe almasýǵa múmkindik beredi.
Qazaqstan Parlamenti Senaty tóraǵasynyń orynbasary О́zbekstanǵa sapar aıasynda memleketaralyq qatynasty nyǵaıtýdy kózdeıtin birqatar kezdesý ótkizdi. Jaqyp Asanov О́zbekstan Olıı Májilisi Senaty tóraǵasynyń birinshi orynbasary Sodık Safoevpen kezdesý barysynda Qazaqstan men О́zbekstan arasyndaǵy odaqtastyq qatynasty nyǵaıtýdyń strategııalyq mańyzyn atap ótti. Ol kúshine enetin odaqtastyq qatynas týraly shart elder arasyndaǵy senim men ashyqtyqty tereńdetýdegi mańyzdy qadam bolatynyn jetkizdi.
Sonymen qatar J.Asanov О́zbekstan mahallalar qaýymdastyǵynyń basshysy Kahramon Qurbonbaevpen kezdesý barysynda О́zbekstanda jergilikti ózin ózi basqarý tetigi retinde qurylǵan «mahalla jetiligi» dep atalatyn qurylymnyń mańyzyna toqtaldy.
