«Qyzyljar» arnaıy ekonomıkalyq aýmaǵynda ashylǵan kásiporyn tolyq qýatynda jumys istegende 300-deı adamǵa jetkilikti jumys orny qurylady. Arnaıy ekonomıkalyq aımaqta ornalasýdyń eresen artyqshylyǵy – jer tóleminen, basqa da salyqtardan bosatylady. Ári kompanııa «Damý» qorynan ekinshi deńgeıli bank arqyly 8%-dyq jeńildetilgen mólsherlememen nesıe alǵan. Qordyń Soltústik Qazaqstan oblystyq fılıalynyń dırektory Gúlbarshyn Dáýletbaevanyń aıtýyna qaraǵanda, bıyl 309 joba qarjylandyrylǵan.
«Sonyń biri – ashylyp otyrǵan osy zaýyt. Endi bul kásiporyn qaladaǵy jumysy jaqsy júretin óndiris oshaǵynyń birine aınalatyn shyǵar degen úmit bar», deıdi ol.
Zaýyt ónim óndirýge qazirdiń ózinde kirisip ketti. Endi bir jarym aıdan soń taýarlaryn shetelge eksporttaı bastaıdy.
Petropavlda aǵashty óńdep, faner shyǵaratyn bir zaýyt 2020 jyly ashylǵan. Ol «Soltústik faner zaýyty» dep atalady. Onyń quny 5 mlrd teńge bolǵan edi. Endi sol qatarǵa myna zaýyt ta qosylyp otyr. Ol aǵashty tereńdep óńdep, jyly pellet materıaldaryn da shyǵarady. Osyndaı materıaldardy buryn qurylys kompanııalary syrttan ımporttaıtyn. Endi sol ımporttyń 13%-yn osy zaýyt ónimderi jabady.
«Biz aǵash óńdeýde bul zaýytpen shektelmeımiz. 2027 jylǵa deıin bizde «SFK Furniture» fırmasy túrli jıhaz shyǵaratyn, quny 2,5 mlrd teńgelik jańa zaýyt turǵyzady. 2026 jyly aǵash jańqalarynan plıtkalar jasaıtyn zaýyt ta iske qosylady. 2025 jyly aǵash materıaldaryn qurastyrýǵa qajetti jelim, shaıyr sııaqty hımııalyq komponentterdi shyǵaratyn zaýyt ta paıdalanýǵa beriledi. Onyń qurylysy qazir aıaqtalýǵa jaqyn», deıdi oblystyq Kásipkerlik jáne ındýstrııalyq-ınnovasııalyq damý basqarmasynyń bastyǵy Darhan Ámrın.
Sóıtip, aǵash óńdeý klasteri qataryna óńirimizdiń 30-dan artyq zańdy tulǵasy, 90 jeke kásipkeri qatysatyn kórinedi. Bul jergilikti, arzan aǵash materıaldaryn óńdeýdiń ozyq joly bolmaq.
Alaıda kesilgen árbir aǵashtyń ornyna jańa kóshet egip otyrý jumysy umyt qalmasa boldy. Jyl saıyn teriskeı ormandarynda jarty mıllıon tekshe metrden artyq aǵash kesiledi eken. Bir báıterekti bes mınýtta joq qylýǵa bolady, al ósirý úshin ondaǵan jyl kerek. Sondyqtan ony saqtaý men qalpyna keltirý jumystary qalaı júrip jatqanyn oblystyq Tabıǵat resýrstary basqarmasynyń bastyǵy Beıbit Esmanovtan suraǵanymyzda, ol jyl saıyn 23 mıllıondaı aǵash, qaraǵaı kósheti otyrǵyzylatynyn aıtty.
Oblysta ormandy qalpyna keltirýge arnalǵan 2025 jylǵa deıingi arnaýly jospar da bar. «Osy josparǵa sáıkes oblys aýmaǵyndaǵy 20 myń gektar ormandy alqapqa 100 mıllıon kóshet otyrǵyzýymyz kerek. Qazir oblystaǵy 12 orman sharýashylyǵy kásiporyndarynda bul jumys qyzý júrgizilip jatyr», dedi ol.
Soltústik Qazaqstan oblysy
