Erlan Qoshanov óz sózinde Birikken Arab Ámirlikteri halyqaralyq qaýymdastyqta bedeli zor, ekonomıkasy qaryshtap damyǵan memleketterdiń kósh basynda turǵanyn atap ótti.
Keıingi jyldary balamaly energetıka, jasandy ıntellekt, týrızm men qarjy salasynda aýqymdy reformalardy júzege asyryp, dúnıe júzindegi ozyq tehnologııalardyń ortalyǵyna aınalǵanyna erekshe nazar aýdardy. Osy turǵyda Ámirlikterdiń atom energetıkasyndaǵy tarıhı jeńisimen, atap aıtqanda, «Baraka» atom elektr stansasynyń tolyq iske qosylýymen quttyqtady.
– Búginde Ámirlikter – Qazaqstannyń ıslam jáne arab álemindegi asa mańyzdy seriktesi. Biz – rýhtas, qanattas eldermiz. Kóshbasshylarymyzdyń arasyndaǵy berik baılanys, myzǵymas dostyq arqyly ekijaqty qarym-qatynasymyz jańa sapaly deńgeıge kóterildi. Byltyr Qazaqstan Prezıdenti Qasym-Jomart Toqaev Birikken Arab Ámirlikterine resmı jáne jumys saparmen eki ret bardy. Qazirgi kúrdeli geosaıası jaǵdaıda yntymaqtastyqqa tyń serpilis berý turǵysynan bul saparlardyń tarıhı máni zor, – dedi palata tóraǵasy.
Májilis spıkeri ekijaqty yntymaqtastyqty tereńdetýdiń áleýeti zor ekenin aıtyp, parlamentaralyq baılanysty odan ári nyǵaıtýǵa shaqyrdy.
– Qazirgi ýaqytta jańartylatyn energetıka, kólik-logıstıka, jasandy ıntellekt pen aqparattyq tehnologııalar, jyljymaıtyn múlik, bilim berý jáne taǵy da basqa baǵyttarda birlesken serpindi jobalar iske asyrylyp jatyr. Sonyń biri de biregeıi – alystan kóz tartyp turǵan «Abý Dabı Plaza» kesheni Ortalyq Azııa aýmaǵyndaǵy eń bıik ǵımarat retinde elorda maqtanyshyna aınaldy. Bul – Qazaqstan men Ámirlikter arasyndaǵy dostyqtyń rámizi ispetti, – dedi Májilis tóraǵasy.
