Bıylǵy «Daryn» syılyǵynyń jeńimpazdary qatarynda túrli baıqaýlar men festıvalderdiń laýreattary, sporttyq jarystardyń jeńimpazdary, qoǵam qaıratkerleri men belsendiler bar. Qazylar alqasy laýreattardy «Ádebıet», «Ǵylym», «Dızaın jáne beıneleý óneri», «Jýrnalıstıka», «Klassıkalyq mýzyka», «Kreatıvti bastamalar», «Sport», «Teatr jáne kıno», «Estrada» jáne «Halyq shyǵarmashylyǵy» atalymdary boıynsha saralap, daýys bergen.
Marapattaý kezinde Mádenıet jáne aqparat mınıstri Aıda Balaeva elimizde ortaq múdde men maqsattardy ustanatyn progressıvti ári daryndy býynnyń ósip kele jatqanyn atap ótti.
«Sizder – halyqtyń úmiti men tiregisizder. El Prezıdenti jastar úshin úsh basty baǵdardy únemi aıtyp keledi. Ol – bilimge umtylý, eńbekqorlyq jáne patrıotızm. Bular – myqty ári tabysty ulttyń negizi bolatyn úsh tuǵyr. Demek ulttyń bolashaǵyn sizder aıqyndaısyzdar. Sondyqtan Memleket basshysy jastarǵa úlken úmit artady. Memleket tarapynan jan-jaqty qoldaýdy jalǵastyra beredi», dedi mınıstr.
«Táýelsizdik urpaqtary» grantynyń ıegerleri retinde úzdik jobalar usynǵan 30 jas tańdalypty. Olardyń jobalary mádenıet, ǵylym, medıa, aqparattyq tehnologııalar, bıznes salalaryn qamtıdy. Bıyl baıqaýǵa jańa «Volonterlik» dep atalatyn baǵyt qosyldy.
«Bul grant Memleket basshysy Qasym-Jomart Toqaevtyń tapsyrmasymen ázirlendi. Sondyqtan búgingi marapattaryńyz – úlken jaýapkershilik. El Prezıdentiniń senimin aqtaıtyndaryńyzǵa shyn júrekten senemin. Árdaıym bıikterden kórinińizder!» dedi A.Balaeva.
Sonymen qatar mınıstr sózinde jastarǵa egemendik pen eldikti nyǵaıtýdaǵy negizgi qundylyqtar týraly aıtty.
«Prezıdentimiz bıylǵy Ulttyq quryltaıda elimiz úshin mańyzdy birneshe qundylyqty atap ótken edi. Ol qundylyqtar – táýelsizdik jáne otanshyldyq, birlik pen yntymaq, ádildik jáne jaýapkershilik, zań men tártip, eńbekqorlyq jáne kásibı biliktilik, jasampazdyq pen jańashyldyq. Memleket basshysy belgilep bergen naqty qundylyqtardy ustaný – jastardyń damýyna, qoǵamdyq sananyń ózgerýine oń yqpal eteri anyq», dedi mınıstr.
Aıta keteıik, «Táýelsizdik urpaqtary» konkýrsynyń ár jeńimpazyna 3 mln teńge kóleminde júlde berildi. Bıyl konkýrsqa 1 284 ótinim túsip, onyń 897-si qabyldandy.
«Daryn» jastar syılyǵynyń 20 jeńimpazyna «Daryn» memlekettik jastar syılyǵynyń laýreaty» ataǵy berilip, estelik statýetka men aqshalaı syılyq tabystaldy. Arasynda «Jýrnalıstıka» atalymy boıynsha at ozdyrǵan áriptesimiz Nazerke Jumabaı da bar. Áriptesimizdi ataýly syılyǵymen quttyqtap, shyǵarmashylyq tabys tileımiz.
