Kóptegen eldiń shyǵarmashylyq ókilderin biriktirgen jańa ulttyq opera mádenı ómirdegi aıtýly oqıǵalardyń biri bolǵany ras. Operany daıyndaý barysynda Altyn Orda tarıhy boıynsha belgili ǵalymdar – Ilnýr Mırgalıev, Ilııas Kemaloglý jáne Nurlan Atyǵaevpen keńes júrgizilip, taqyryp egjeı-tegjeıli zerdelengen. Tarıhı naqtylyq saqtalǵan.
Eki kún ishinde qoıylymdy 4080 adam tamashalap, orta ǵasyrdyń eń iri memleketi – Altyn Ordanyń qalyptasý dáýirine saıahat jasady. Qalyń kórermen mańyzdy tarıhı oqıǵalar men erekshe sátterdi sezine aldy.
Qoıylymǵa barlyǵy úsh júzden astam opera, hor, balet ártisteri qatysty. Teatrdyń sımfonııalyq orkestriniń súıemeldeýi, sahnanyń túrlenýi, jaryq effektileri men beıneproeksııalar kórermendi erekshe áserge bóledi.
Aıta keteıik, «Han Sultan. Altyn Orda» operasynyń premerasy aı basynda ǵana Almaty qalasynda anshlagpen ótken edi.
