Sýret: bai-bol.kz
2024 jyly respýblıkalyq bıýdjetten 1,9 trln teńge bólingen, onyń 276,4 mlrd-y – qazirgi baǵdarlamalardy, 1,5 trln-y – damý baǵdarlamasyn júzege asyrýǵa arnalǵan. Finprom málimetinshe, ákimdikterdiń maqsatty transfertterdi oryndaý kólemi 97,9%-dy quraǵan, sonda ıgere almaý kórsetkishi – 2,1%. Paıyzǵa qarasaq, sonshalyqty kóp emes sekildi, al sanǵa shaqsaq – 40 mlrd teńge shyǵady. Muny árıne, az dep aıtý qıyn.
Qarajatty meılinshe túgel jumsaǵan – Astana ákimdigi. 88,3 mln teńge artylǵan, tıisinshe ol bıýjetti únemdeýge qatysty. Shyǵys Qazaqstan oblysy 99,9%-ǵa ıgergen. Dittegen maqsatyna jetpegen qarjy kólemi – 69,8 mln teńge, onyń 8,1 mln-y – únemdeý, 61,7 mln-y – ıgerilmeý. Qyzylorda oblysyndaǵy artylǵan qarajat kólemi – 120,8 mln teńge, onyń 36,6 mln teńgesi únemdeýge qatysty bolsa, 84,3 mln teńgesi ıgerilmeı qalǵan. Úzdik bestik qataryna Túrkistan oblysy men Shymkent kirgen. Olardaǵy ıgerý úlesi – 99,8%.
Aýtsaıderler: Mańǵystaý oblysy – bólingen qarjynyń 85,1%-y ıgerilgen (16,9 mlrd teńge jumsalmaǵan); Atyraý oblysy – 94,2% (4,2 mlrd teńge ıgerilmegen); Aqmola oblysy – 97,2% (3,5 mlrd teńge ıgerilmegen). 20 ólkeniń toǵyzynda ıgerilmegen qarjy kólemi 1 mlrd teńgeden asyp túsken.
«Bul aıtarlyqtaı problema. Sebebi qarajattyń barlyǵy derlik halyqtyń ómir sapasyn jaqsartatyn ártúrli jobalarǵa baǵyttalýǵa tıis edi. Alaıda túrli sebeppen bul maqsat oryndalmady», deıdi Finprom sarapshylary.
