Naýryz merekesine oraı, túrkitildes halyqtardyń etnıkalyq tarıhy men mádenı murasyn nasıhattaýǵa baǵyttalǵan forým Memlekettik ortalyq mýzeı dırektorynyń mindetin atqarýshy Ǵalııa Temirtonnyń quttyqtaý sózimen ashyldy. Ol adamzat órkenıetinde ózgeshe mánge ıe túrki halyqtarynyń kórnekti dástúrleri mádenı muralarymyzdyń qaımaǵy ekenin atap ótti.
Forýmnyń plenarlyq otyrysynda Naýryz meıramynyń tarıhy men tamyryn arqaý etken mazmundy baıandamalar oqyldy. Is-shara qonaqtarynyń qatarynda TÚRKSOI mýzeıler qaýymdastyǵynyń bas úılestirýshisi Djavıd Movsıýmlıý, QR Materıaldyq emes mádenı murany qorǵaý jónindegi ulttyq komıtet tóraǵasynyń orynbasary Rýstam Mýzafarov, Túrik respýblıkasynyń Bas Konsýldyǵynyń basshysy Evren Mýderrısoglý, Almaty qalasyndaǵy Iran Bas Konsýldyǵynyń mádenı attashesi Hosseın Agazade, Ázirbaıjannyń Almaty qalasyndaǵy Bas konsýly Anar Gýseınzade, Reseı Ǵylym akademııasynyń Sibir bólimshesiniń Gýmanıtarlyq zertteýler jáne soltústik shaǵyn halyqtar máseleleri ınstıtýtynyń arheologııa jáne etnografııa bóliminiń bas ǵylymı qyzmetkeri Ekaterına Romanova, О́zbekstandaǵy «Jibek joly» halyqaralyq ǵylymı zertteý ınstıtýtynyń professory Elmıra Gıýl, Qyrǵyz Respýblıkasy Ulttyq tarıhı mýzeıiniń bas qor saqtaýshysy Nýrhat Imanqulova, «Qyrym araly» zerthanasynyń dızaıneri jáne qalpyna keltirýshisi Elına Altynbekova, Qazaqstan qolónershileri odaǵynyń tóraǵasy, sýretshi-etnodızaıner, materıaldyq emes mádenı mura ulttyq komıtetiniń sarapshysy Aıjan Bekkýlova bastaǵan sarapshylar sóz alyp, taqyrypqa qatysty oı-pikir almasty.
Forým aıasynda «Túrki dástúrleri: etnomádenı erekshelikter» taqyryptyq seksııasy men mýzeıler qaýymdastyǵy ókilderiniń, shyǵarmashylyq pen ǵylym salasyndaǵy jastardyń, óner qaıratkerleriniń, tarıh, mádenıet, týrızm, bilim berý, BAQ mamandarynyń qatysýymen OPEN SPACE – «Ulttyq mádenıetti nasıhattaýdyń zamanaýı baǵyttary» áleýmettik-mádenı pikirlesý alańy úzdik sarapshylardy bir alańda jınady.
Ortalyq mýzeı dırektorynyń orynbasary Anna Kýshenko mádenı muralardy zaman talabyna saı nasıhattaý men jetildirýdiń ózekti máselelerin saralasa, Mýzeıdiń bas qor saqtaýshysy Úmit Áshimova mýzeı zattaryn jınaqtaý, esepke alý jáne saqtaý týraly aqparat berdi.
Is-shara barysynda qatysýshylar qazirgi zamanǵy kommýnıkasııalar men mýzeılerdiń, mádenı jáne shyǵarmashylyq uıymdardyń ulttyq mádenıetti, beıneleý ónerin nasıhattaýdaǵy róli, áleýmettik-mádenı ózara árekettesý mehanızmderi, sondaı-aq bilim berý men etnokórkemdik yntymaqtastyqty uıymdastyrý arqyly talantty jastardy qoldaý máselelerin talqylady.
Forým Memlekettik Ortalyq mýzeıiniń qorynan alynǵan etnografııalyq kolleksııalar men Qazaqstan qolónershileri men etnodızaınerleriniń avtorlyq týyndylaryn kórsetetin «ShEBERLER ALAŃY» kórmesine ulasty. Bul kórme ejelgi dástúrlerdi zamanaýı ınterpretasııalar arqyly jetkizýimen erekshelendi.
«Forým jumysynyń mindeti túrkitildes halyqtardyń tarıhı etnogenezin, mádenıeti men ónerin zerdeleý. Túrkitildes halyqtardyń tarıhı-mádenı qundylyqtaryn dáripteý hám olardy zertteý qaı kezde de mańyzdy. Joba mádenıet pen ǵylym uıymdary arasyndaǵy yntymaqtastyqty jandandyryp, ǵylymı jáne mádenı-bilim berý qyzmeti salasyndaǵy dástúrli jáne ınnovasııalyq baǵyttardy damytý perspektıvalaryn talqylaý úshin taptyrmas alań», deıdi QR Memlekettik ortalyq mýzeıi dırektorynyń mindetin atqarýshy Ǵalııa Temirton.
