Bas qosýǵa Qazaqstannyń ǵylymı jáne bilim berý qaýymdastyǵynan 100-den astam ókilder, sondaı-aq Qytaı, Reseı, Polsha, Úndistan, Qyrǵyzstan jáne basqa elderden kelgen sarapshylar qatysty.
Mańyzdy jıyndy ashyp sóz sóılegen Prezıdenttik ortalyǵynyń dırektory Baqytjan Temirbolat:
«Búginde biz qarqyndy ózgerister dáýirinde ómir súrip jatyrmyz, bul kezeńde ǵylym jahandyq máselelerdi sheshýde barǵan saıyn mańyzdy ról atqaryp jatyr. Klımattyń ózgerýi, energetıkalyq daǵdarys, resýrstardyń tapshylyǵy, sıfrlyq qaýipsizdik jáne basqa da ótkir máseleler ınnovasııalyq kózqarastar men ǵylymı sheshimderdi talap etedi. Qazaqstan Prezıdenti Q.K.Toqaev Ǵylym qyzmetkerleri kúnine arnalǵan óz sózinde: «Ǵylym shyńyna aparar jol – qıyn. Bul jolda tek óz isine shyn berilgen, eńbekqor, tabandy jáne shyǵarmashyl jandar ǵana qıyndyqtarǵa tótep bere alady. Shyn máninde ozyq ultqa aınalý úshin osy qundylyqtardy qoǵamǵa sińirýimiz qajet», dep atap ótti. Búgingi konferensııamyz alys-jaqyn shetelder men Qazaqstan ókilderin biriktirip, tájirıbe almasýǵa, birlesken ǵylymı zertteýlerdi bastaýǵa, akademııalyq ashyqtyqty keńeıtýge jaǵdaı jasap, osy úderisterge óz úlesin qosady», dedi.
Sondaı-aq, atalǵan jıynnyń mańyzy týraly pikir bildirgen Astana International University birinshi vıse-prezıdenti Anar Myrzagalıeva hanym, bul retki konferensııa elimizdiń bilim jáne ǵylym salasyndaǵy jahandyq úderisterge belsendi qatysýynyń aıǵaǵy ekenine toqtalyp:
«Biz úshin bul tek pikir almasý alańy ǵana emes, sonymen qatar bolashaqtaǵy halyqaralyq áriptestikter men ortaq jobalarǵa bastama bolatyn mańyzdy qadam. Qatysýshylar men spıkerlerdiń aýqymy bul alańnyń ózektiligin jáne mańyzdylyǵyn dáleldep otyr. Ǵylym men bilimge negizdelgen damý – elimizdiń strategııalyq tańdaýy», dedi.
Aıta ketý kerek, konferensııa baǵdarlamasy sıfrlandyrý, generatıvti jasandy ıntellektini paıdalaný, jahandyq ekonomıka, kreatıvti ındýstrııalar, halyqaralyq yntymaqtastyq, gýmanıtarlyq jáne jaratylystaný ǵylymdary, sondaı-aq jahandyq trendter aıasynda bilim berýdi damytý perspektıvalary sııaqty negizgi baǵyttardy qamtydy. Sonymen qatar, atalǵan jıyn ǵylymı pikir almasý alańy ǵana emes, sonymen qatar akademııalyq qaýymdastyq, memlekettik qurylymdar men halyqaralyq uıymdar ókilderi arasyndaǵy tyǵyz baılanystardy ornatýǵa múmkindik beredi.
