Foto: egemen.kz
9 sáýir kúni Memleket basshysy sý salasyndaǵy irgeli qujat jańa Sý kodeksine qol qoıdy. Kodeks elimizdiń turaqty ekonomıkalyq damýyn qamtamasyz etýge, halyqtyń ómir súrý sapasyn arttyrýǵa jáne qorshaǵan ortany qorǵaýǵa yqpal etetin, sýdy qaýipsiz ári tıimdi paıdalaný deńgeıine qol jetkizýge jáne ony turaqty túrde qoldaýǵa múmkindik beredi. Osy qatarda «Sý resýrstaryn basqarý júıesin 2030 jylǵa deıin damytý tujyrymdamasy», «2028 jylǵa deıin sý sharýashylyǵyn damytýdyń keshendi jospary» jáne «2026 jylǵa deıingi sýdy únemdeý jónindegi jol kartasy» syndy sý sharýashylyǵy salasyndaǵy basymdyqtardy aıqyndaıtyn negizgi strategııalyq qujattar da bar.
Mınıstr baıandamasynda Sý sharýashylyǵyn damytýdyń Keshendi josparynda 160 naqty is-shara qamtylǵanyn atap ótti. Bul jobalardy tıimdi iske asyrý jáne baqylaý maqsatynda salalyq mınıstrlik jobalyq basqarý tetikterin engizgen. Sondaı-aq, arnaıy jobalyq ofıs qurylyp, óńirlik deńgeıde turaqty baılanys ornatylǵan.
«Bıyl bıýdjet qarajaty men halyqaralyq qarjy uıymdarynyń (Búkilálemdik, Islam jáne Eýropalyq bankter) qarajaty esebinen 6 myńnan astam shaqyrymdy quraıtyn 1485 kanal qaıta jańǵyrtylyp jatyr. Onyń ishinde 2025 jyly eki júz myńǵa jýyq gektar júktelgen aýmaǵymen myń shaqyrymǵa jýyq (962 km) 275 kanal paıdalanýǵa beriledi dep josparlanyp otyr», dedi Nurjan Nurjigitov.
2021–2025 jyldar aralyǵynda shamamen jeti myń shaqyrym ırrıgasııalyq kanal jańǵyrtylady.
Aıta keteıik, 2021-2024 jyldar aralyǵynda 8577 ırrıgasııalyq kanaldyń (47 myń km-den astam) 884-ine (5406 km) kúrdeli jóndeý jáne rekonstrýksııalaý jumystary júrgizilgen. Byltyr 162 kanaldy (778,3 km) rekonstrýksııalaý aıaqtalǵan.
