Kollajdy jasaǵan – Qonysbaı ShEJIMBAI, «EQ»
Bul týraly Energetıka vıse-mınıstri Suńǵat Esimhanov aıtty. Onyń sózinshe, mınıstrlik ekologııalyq turaqty bolashaqqa baǵyttalǵan júıeli jumysty jalǵastyrady. 2024 jyl qorytyndysynda elimizde jalpy qýaty 3 032 MVt bolatyn 153 jańartylatyn energııa nysany jumys istep tursa, qazir qýaty 3 122 MVt-ǵa teń 156 nysan el ıgiliginde. Bul eldegi jalpy elektr energııasy óndirisiniń 6,43%-yn qamtamasyz etti.
«Byltyr jańartylatyn energııa kózi nysandarynyń jalpy elektr energııasyn óndirý kólemi saǵatyna 7,581 mlrd kVt bolǵan: jel energetıkasy – saǵatyna 4 513 mlrd kVt; kún energetıkasy – 1 889,6 mlrd kVt; gıdroenergetıka – 1 177 mlrd kVt; bıoenergetıka – 1,58 mlrd kVt. Odan bólek, qazir qýaty 2 258 MVt bolatyn 91 joba iske asý satysynda tur. Olar – 20 jel elektr stansasy (1 364,5 MVt), 9 kún elektr stansasy (282,6 MVt), 58 shaǵyn sý elektr stansasy (591,81 MVt) jáne 4 bıo-energetıkalyq joba (19,25 MVt)», dedi.
Salada aýksıondyq saýda tetigi engizilgennen keıin Qytaı, Germanııa, Túrkııa, Fransııa, BAÁ, Ońtústik Koreıa elderinen sektorǵa 260-tan astam kompanııa kelgen.
«2027 jylǵa deıin jańartylatyn energııa jobalary boıynsha 4,6 GVt kóleminde aýksıondyq saýda ótkizý josparlanǵan. Ondaǵy negizgi basym baǵyttar – energııany jınaqtaý júıelerin damytý, B2B-kelisimsharttar tetigin jetildirý, JEK nysandaryn teńgerimdeýshi naryqqa tolyq engizý, jańa JEK nysandary úshin dıspetcherlik artyqshylyqty alyp tastaý máselesin qarastyrý men shaǵyn kólemdi JEK jobalaryn damytý», dedi vıse-mınıstr.
Aıtýynsha, el azamattary úı shatyrynda kún energııasyn óndirip, paıda tabýyna da bolady.
«Byltyr zańnamany jańarttyq. Qarapaıym tilmen aıtqanda, endi jeke úı turǵyny shatyrǵa 200 kılovattyq kún panelderin ornatyp, onyń 100 kılovatyn ózi tutynyp, qalǵan 100 kılovatty sata alady. Sol sııaqty energııa taratýshy kompanııa ol energııany óńirdegi ortasha tarıfpen satyp alýǵa mindetti. Bul sharany óte tıimdi tetik dep sanaımyz», dedi S.Esimhanov.
Vıse-mınıstrdiń sózinshe, shaǵyn bıznes bul múmkindikti belsendi túrde paıdalana bastaǵan. Byltyrdyń ózinde jalpy qýattylyq eki ese artypty.
