Sýret: adyrna.kz
Igi iske oblys ortalyǵy men Qosshy qalasynyń turǵyndary uıytqy boldy. Kókshetaý qalasynyń irgesindegi Buqpa taýynyń baýraıy adamdar aǵynyna toldy.
Uıymdastyrýshylardyń aıtýyna qaraǵanda, bıylǵy jyldyń alǵashqy jartysynda «Taza Qazaqstan» aksııasyna qatysýshy adamdardyń sany 463 myńnan asqan. Is nátıjesinde 80 myń tonna qoqys jınalǵan. Jergilikti oqý oryndarynyń stýdentteri men bilim alýshylary aǵa býynnyń tálimdi isinen taǵylym alyp, qolǵabys etip júr. Kókshetaýda UNISEF halyqaralyq eriktiler qozǵalysyna 300-den astam jas qosylypty.
Senbilik barysynda Qosshy qalasynda da aýqymdy jumys atqaryldy. Sarqyrama ózeniniń jaǵalaýy jel ushyryp ákelgen qoqystan tazartylyp, kóp-kórim jaqsaryp qaldy. Jergilikti bılik Qosshydaǵy jumys áldeqashan dástúrge aınalǵanyn aıtady.
– Jazda «Jasyl el» aksııasy ótkizildi, – deıdi Qosshy qalasynyń ákimi Azamat Qapyshev, – aksııaǵa júzdegen adam qatysty. Negizinen stýdentter men mektep oqýshylary. Olar jazǵy demalys kezinde qol qýsyryp qarap otyrmaı, qoǵamǵa qajetti sharýamen aınalysty. Ár jyl saıyn tabıǵat janashyrlarynyń qatary kóbeıip keledi. Bul qýanarlyq jaıt. Demek ózderi turyp jatqan jerdi qurmettep, onyń ajarly bolýyn qalaıtyn, ádemi bolǵanyn kórgisi keletin izetti býyn ósip keledi. Mundaı aksııalardyń paıdaly jaǵy da osy.
Senbilikke «Astana» halyqaralyq ýnıversıtetiniń ekolog mamandyǵyn ıgerip jatqan stýdentteri de qatysty. «StopMusor» jobasy da «Taza Qazaqstan» aksııasymen sabaqtasyp jatyr.
– Biz ár úsh aı saıyn kúsh biriktirip ortaq iske atsalysamyz, – deıdi ekologııalyq uıymdar qaýymdastyǵynyń tóraǵasy Aıgúl Soloveva. – Prezıdent halyqqa Joldaýynda sıfrlandyrý máselesi týraly oryndy pikir aıtty. Elimizdiń ekologııa máselesine de sıfrlandyrý óte kerek.
Árkim óziniń týǵan ólkesiniń taza bolǵandyǵyn qalaıdy. Tek jaqsy iske jarshy bolyp, uıymdastyra bilý qajet.
– Biz osy aksııany tórtinshi jyl ótkizýdemiz, – deıdi Ekologııa jáne tabıǵı resýrstar mınıstrligi Ekologııalyq retteý jáne baqylaý komıtetiniń tóraǵasy Erbolat Qojyqov. – Bir kún ishinde elimiz kóleminde mıllıonnan astam adam qatysqan ıgilikti jumys atqaryldy. Alpys myń tonnaǵa jýyq qoqys shyǵarylyp, tıisti ornyna jetkizildi. Búginde jumystyń aýqymyna ǵana emes, sapasyna da nazar aýdaramyz. Turmystyq qaldyqtardy iriktep jınaımyz. Máselen, plastıkalyq ydystar bólek jınalady.
Tazalyq aksııasy oblystyń barlyq aýdandarynda ótkizildi. Osy bir tize qosqan taǵylymdy isten el birliginiń bekem ekendigin aıqyn ańǵarýǵa bolady.
Aqmola oblysy
