Sport • 01 Qazan, 2025

Jarys kúndeligi

30 ret

kórsetildi

3 mın

oqý úshin

Batýttaǵy gımnastıkadan Bolgarııanyń Varna qalasynda ótken álem kýboginiń kezeńdik saıysynda Vıktorııa Býtolına men Erlan Tasmaǵambetov 49,680 upaı jınap, qola medal enshiledi. Jerlesterimiz tek japonııalyq Iýseı Masýmoto men Hıkarý Morı (50,330 upaı), reseılik Danıla Kasımov pen Anjela Bladsevadan (50,290 upaı) qalyp qoıdy.

Ǵalym SÚLEIMEN

Sý sporty túrlerinen Úndistannyń Ahmedabad qalashyǵynda shymyldyǵy túrilgen Azııa chempıonatyn elimizdiń quramasy sátti bastady. Jarystyń alǵashqy kúni qorjynymyzǵa úsh medal tústi. 100 metrge batterflıaı ádisimen júzýde Maksım Skazobsov kúmis alsa, dál sol qashyqtyqqa batterflıaı ádisimen júzgen Sofıa Spodarenko qolaǵa qol jetkizdi. 50 metrge shalqalaı júzýde Sofııa Ábýbákirova ekinshi orynǵa ıe boldy.

«Astana» klýbynyń veloshabandozy, germanııalyq Maks Kanter bir apta ishinde eki birdeı dúbirli dodada daralandy. Alǵashynda Belgııadaǵy «Omlýýp van het Hýtlandta» ekinshi oryn alsa, kúni keshe Fransııadaǵy «Parıj-Shonıde» de dál sol nátıjeni qaıtalady. Osyǵan deıin Kanter qart qurlyqtyń tas joldarynda ótken «Almerııa klassıginde» kúmispen kúptelip, «Famenn Ardenn klassıginde» bas júldeni oljalaǵan edi.

Fýtzaldan «Qaırat» klýbynyń basynan baǵy taıa bastaǵan syndy. Elimiz tarıhyndaǵy eń ataqty komanda ishki chempıonattyń tórtinshi týrynda «Semeıden» 4:10 esebimen oısyraı utyldy. Almatylyqtar arasynan Atırson Olıveıra men Kaıo Rýız eki goldan soqty. Semeılikter sapynda Pedro Enrıke het-trık jasasa, Anderson Alves pen Marselo dýbl avtory atandy. Sondaı-aq Nursultan Pııaly, Rınat Tóreǵazın, Erjan Kármenov bir-bir retten nysanany dál kózdedi. Osy kezdesýdiń 32-mınýtynda «Qaırattyń» oıynshysy Alves Romýlonyń oıynnan qýylǵanyn da aıta ketken jón.

Túrkistanda trıatlonnan Azııanyń ashyq kýbogi aıaqtaldy. Jerlesterimiz arasynan Daryn Qonysbaev sátti óner kórsetip, kúmis medaldy ıelendi. Bas júldeni Reseı sportshysy Denıs Kolobrodov oljalasa, onyń otandasy Roman Mıneev qola júldeni qorjynǵa saldy.

Qurlyqtyń hokkeı lıgasynda (QHL) kúsh synasyp júrgen «Barys» Vladıvostoktyń «Admıralyn» qabyldady. Birinshi kezeńde esep ashylǵan joq. Úzilisten keıin astanalyqtar eki márte mergendik tanytty. Goldardy Vsevolod Logvın men Ańsar Shaıhmeddenov soqty. Úshinshi kezeńde Meıson Morellı matchtyń sońǵy núktesin qoıdy – 3:0. Keıingi eki oıyndaǵy jeńisinen keıin «Barys» 11 upaımen Shyǵys konferensııasynyń jarys kestesinde altynshy orynda tur.

11-12 qazanda Aqtaýda dzıýdodan «Asian Open» týrnıri uıymdastyrylady. Oǵan 200-den asa balýan qatysady. Baq synaýshylardyń qatarynda Danııar Shamshaev (81 kg), Dıdar Hamza (90 kg), Erasyl Qajybaev (+100 kg), basqa da qurlyqtyń deńgeıdegi dodalarda ózderin moıyndatqan saqa sportshylar bar.