Sýret: rb1ncm.ru
- 25–26 qazan kúnderi Bishkekte kásipqoı boks keshi uıymdastyrylady. Jarysta elimizdiń tanymal bylǵary qolǵap sheberi, Olımpııa oıyndarynyń qola júldegeri, álem chempıony Sáken Bıbosynov sharshy alańǵa shyǵady. Qandasymyz jergilikti boksshy Ádilet Qashqynbekovpen kúsh synasady.
- Elimizdiń daryndy fýtbolshysy, 18 jastaǵy Raýl Allahverdıev Ispanııanyń «Raıo Valekano» klýbynyń qosalqy quramymen kelisimshartqa otyrdy. Endi ol sporttyq jolyn Pıreneı túbeginde jalǵastyrady.
- Aralas jekpe-jekti serik etken qazaqtyń qos sańlaǵy sheteldik promoýshendermen kelisimsharqa otyrdy. Atap aıtsaq, Salamat Isbýlaev «Professional Fighters League» (PFL) uıymyna qabyldandy. Qandasymyz búginge deıin 9 ret oktagonǵa shyǵyp, barlyq básekede aıqyn basymdyq tanytty. «Octagon»-nyń burynǵy chempıony Súndet Aıtqul aldaǵy ýaqytta «UAE Warriors» uıymdastyrǵan týrnırlerge qatysady. Qandasymyz 22 qazanda brazılııalyq Gýıdo Santospen saıysqa túsedi. Súndet buǵan deıin ótkizgen 13 básekesiniń 11-in óz paıdasyna sheshti.
- «Astana» veloklýby sapyndaǵy ıtalııalyq legıoner Matteo Malýchellı «Malaızııa týrynda» tabysty óner kórsetti. Veloshabandoz bastapqy úsh kezeńniń ekeýinde shashasyna shań juqtyrmaı, máre syzyǵyn birinshi bolyp qıyp ótti. Taǵy bir saıysta ekinshi oryndy ıelendi.
- Úndistanda sý sporty túrlerinen Azııa chempıonaty jalǵasyp jatyr. Jarys bastalǵan kúni jerlesterimiz úsh júlde alsa, ekinshi kúni qorjynymyz taǵy eki medalmen tolyqty. 50 metrge erkin tásilmen júzýde Gleb Kovelenıa kúmispen kúptelse, osy qashyqtyqty brass ádisimen maltyp ótken Aıbat Myrzamuratov ta sol mejeden kórindi.
