Bul týraly QR Densaýlyq saqtaý mınıstrliginiń Sanıtarlyq-epıdemıologııalyq baqylaý komıteti tóraǵasynyń orynbasary Nurqan Sádýaqasov Ortalyq kommýnıkasııalar qyzmetinde ótken baspasóz máslıhatynda aıtty.
Onyń aıtýynsha, 2023 jyldan bastap memleket bastaýysh synyp oqýshylaryn, sondaı-aq memlekettik ataýly áleýmettik kómek alatyn balalardyń jekelegen sanattaryn tegin ystyq tamaqpen qamtamasyz etip keledi.
«Alaıda júrgizilgen taldaý oqýshylardyń as mázirinde tuz, qant pen maı tym kóp, al kókónis, jemis-jıdek pen sút ónimderi jetkiliksiz ekenin kórsetti. Mundaı teńgerimsizdik balalar arasynda semizdik, qant dıabeti jáne júrek-qan tamyrlary aýrýlarynyń erte damýyna yqpal etedi. Osy máseleniń aýqymyn eskere otyryp, memleket salaýatty mekteptik tamaqtanýdy basty basymdyqtardyń biri etti. 2025 jylǵy 1 qyrkúıekten bastap Densaýlyq saqtaý mınıstriniń 2025 jylǵy 4 naýryzdaǵy buıryǵymen bekitilgen jańa Tamaqtaný standarty kúshine endi», dedi N. Sádýaqasov.
Jańa Standart barlyq bilim berý uıymdaryna: balabaqshalarǵa, mektepterge, kolledjderge jáne saýyqtyrý lagerlerine qoldanylady.
Negizgi ózgerister:
-
qant mólsheri 3,6 ese, al tuz mólsheri 5 ese qysqarady;
-
kókónister, jemister men sút ónimderiniń úlesi artady;
-
mázirden shujyq ónimderi, ystalǵan taǵamdar, spredter jáne qant pen tuzy joǵary basqa da ónimder alynady;
-
tátti sýsyndar sýdyń, sút pen qyshqyl sút ónimderiniń, jemis shaılary men qant mólsheri az kompottardyń paıdasyna alynyp tastalady.
Sonymen qatar Standartta shaǵyn jınaqty mektepterde tamaqtandyrýdy uıymdastyrýǵa, arnaıy dıetalyq qajettilikteri bar balalarǵa tamaq berýge qatysty bólek talaptar qarastyrylǵan.
