Sýret: primeminister.kz
Novosibir ǵalymdary delegasııasynyń elimizge kelý sebebi – ǵylymı-tehnologııalyq saladaǵy yntymaqtastyqty nyǵaıtý. Sapar barysynda joǵary tehnologııalyq aýmaq qurý men damytýdyń ozyq tájirıbesimen almasýǵa erekshe nazar aýdaryldy. Atap aıtqanda, Qazaqstanda Novosibir ǵylymı-ınnovasııalyq ekojúıesiniń elementterin engizý boıynsha birlesken jumys tobyn qurý ǵylymı qala qurýdyń modeldik úlgisi retinde talqylanyp jatyr.
Serik Jumanǵarın atap ótkendeı, Kolsovo men Akademqalashyqtyń tájirıbesi Qazaqstannyń zor qyzyǵýshylyǵyn týdyryp otyr.
«Bul ǵylymdy, bilim men ınnovasııany birtutas júıege biriktirýdiń biregeı mysaly. Ol óńirlerdiń bilimi men tehnologııalyq damýyn kommersııalandyrý úshin jaǵdaı jasaıdy», dedi vıse-premer.
Búginde eldegi Almaty oblysy men Kýrchatov qalasynda ǵylymı qala qurý jumysy júrgizilip jatyr. Negizgi baǵyt — energetıka, bıotehnologııa, azyq-túlik qaýipsizdigi, aqparattyq tehnologııa men jasandy ıntellekt, jańa materıaldar men ıadrolyq tehnologııalar.
RǴA vıse-prezıdenti Valentın Parmon delegasııa quramyna Kolsovo ǵylym qalashyǵynyń ınfraqurylymyn damytýǵa tikeleı qatysqan mamandar kirgenin atap ótti. Sapar aıasynda olar Astanadaǵy KMG Engineering Ulttyq onkologııalyq ortalyǵyna baryp, Joǵary bilim jáne ǵylym mınıstrimen kezdesti.
Qazaqstandyq tarap kómir hımııasy salasyndaǵy birlesken jobalarǵa jáne eldiń IJО́ men ekonomıkasyna túrli faktorlardyń áserin baǵalaýǵa qabiletti jasandy ıntellekt modelin ázirleýge qyzyǵýshylyq tanytty.
«Biz kópsalalymyz jáne kez kelgen mindetke quzyrettilikke daıynbyz. Mysaly, kúkirtti qaıta óńdeý tehnologııasy Qazaqstanǵa paıdaly bolýy múmkin», dedi akademık Valentın Parmon.
Tehnoqala jobasyn qurý jónindegi jumys tobyn basqaratyn professor, ekonomıka ǵylymdarynyń kandıdaty Jaqsybek Qulekeev ıadrolyq medısına jáne munaı hımııasy salasyndaǵy Sibir RǴA bólimshesimen yntymaqtastyqtyń zor múmkindigin atap ótti. Ol Novosibir men Tomsk oblysyndaǵy jabdyqtar men ázirlemeler birlesken kúsh-jigermen taratýǵa bolatyn mańyzdy nátıje kórsetkenin aıtty.
Kezdesýde Kýrchatov qalasynyń damý perspektıvasyna erekshe nazar aýdaryldy. Serik Jumanǵarınniń aıtýynsha, onyń bolashaǵy ǵylym men tehnologııany kommersııalandyrýmen tikeleı baılanysty.
Sondaı-aq akademıkter Novosibir Akademqalashyǵynda Qazaqstannyń mádenıet jáne ǵylym kúnderin uıymdastyrýdy usyndy. Vıse-premer Valentın Parmonǵa Qazaqstan Respýblıkasy Premer-mınıstriniń atynan Qazaqstan-Reseı ǵylymı baılanysyn damytýǵa qosqan úlesi úshin alǵys hat tabys etti.
