Qosshy qalasynyń qoǵamdyq mádenı-sport kesheninde «Saz aspaptary sheberleriniń odaǵy» respýblıkalyq qoǵamdyq birlestiginiń qurylýyna oraı I respýblıkalyq quryltaı ótti. Taǵylymdy is-sharaǵa Senat depýtaty Darhan Qydyráli, Májilis depýtaty Ashat Aımaǵambetov, Qosshy qalasy ákiminiń orynbasary Bergen Jumkeıuly, kúıshi Janǵalı Júzbaı men Qaırat Aıtbaev, aqyn Dáýletkereı Kápuly, Kúlásh Baıseıitova atyndaǵy QazUО́Ý prorektory Raýshan Nurtaza, atalǵan oqý ornynyń professorlyq-oqytýshylar quramy qatysty.
Jıynda Ashat Aımaǵambetov birneshe mańyzdy máseleniń túıinin aǵytty. Olardyń ishinde ulttyq aspaptardy mektepter men kolledjderge satyp alý júıesin jetildirý, sheberlerdiń tájirıbesin kelesi urpaqqa úıretý – dástúr sabaqtastyǵyn úzbeý, ulttyq muragerlerdiń tizimin jasap, sertıfıkattaý arqyly resmı qoldaý kórsetý, «Sheber», «Usta» sekildi mártebelerdi resmı moıyndaý jáne qorǵaý qajettigi syndy eleýli tarmaqtar bar.
– Bul – materıaldyq emes mádenı muramyzdy saqtaýdyń mańyzdy joly. О́ıtkeni árbir sheberdiń qolynan shyqqan dombyra, qobyz, sazsyrnaı – jaı ǵana aspaptar emes, halyqtyń úni, ulttyń jany. Sondyqtan sheberlerge tek mádenıet qyzmetkeri emes, ult murasynyń saqshysy retinde de qaraýymyz kerek, – dedi Ashat Aımaǵambetov.
Jańa qurylǵan uıymnyń tóraǵasy bolyp aıtysker aqyn Erkebulan Qaınazarov saılandy. Alqaly jıynda qolǵa alyp otyrǵan jumys týraly aıtqan Senat depýtaty Darhan Qydyráli birlestik jumysyna sát sapar tiledi.
Is-sharaǵa elimizdiń túkpir-túkpirinen jınalǵan Jolaýshy Turdyǵulov, Narbek Ohanov, Sultan Musaev, Baqytjan Dilmanov, Babyr Arǵynov syndy sheberler salaǵa qatysty júıeli másele kóterip, qýanyshyn bildirdi.
– Qazaq halqynyń rýhanı murasy men mýzykalyq mádenıeti ǵasyrlar boıy saz aspaptarynyń únimen ushtasyp keledi. Qobyz, dombyra, sazsyrnaı, sherter, jetigen sııaqty aspaptar tek mýzykalyq qural emes, ulttyń rýhanı jadyn saqtaýshy rámiz retinde tanylǵan. Qudaı qalasa, búkil qazaq sheberleriniń muń-muqtajyn aıtatyn, sheberliktiń jolyn ári qaraı jalǵastyratyn, soǵan baılanysty úlken máselelerdi sheshe alatyn aıtýly odaq bolady dep senemiz, – dedi Jolaýshy Turdyǵulov.
Sóz alǵan sarapshylardyń pikirinshe, elimizde 300-500 arasynda mýzykalyq aspap sheberi bar. Quryltaıda «Saz aspaptary sheberleriniń odaǵy» birlestigi kásibı sheberlerdiń basyn biriktirip, ulttyq aspap óndirisiniń sapasyn arttyrý týraly sóz boldy. Sonymen birge dástúrli tehnologııalardy jańǵyrtýdy jáne jas mamandardy tárbıeleýdi basty nazarda ustap, osy jolda shákirt tárbıeleıtin ustazdar keregi aıtyldy. Uıym aldaǵy ýaqytta sheberlerdiń biliktiligin arttyrý kýrstaryn, kórmeler men festıvaldar ótkizý arqyly mádenıetti nasıhattaý is-sharalaryn josparlap otyrǵanyn alǵa tartty.
Aıta ketsek, Qosshy qalasynyń ákimdigi bıyl naýryz aıynda qolóner sheberleriniń basyn qosyp, qoǵamdyq mádenı-sport kesheniniń ishinen sheberler zalyn ashqan. Ol zalda elimizge jáne álemge tanymal sheberler Bektas Kárimuly, Ashat Bozymbaı, Nurjan Dilmanov, Álııa Qalıasqarovalardyń buıymdary bar. Endi munda «Saz aspaptary sheberleriniń odaǵy» respýblıkalyq qoǵamdyq birlestiginiń jumysy jalǵasady.
