Aıtjan – О́zbekstanda týyp-ósken qandasymyz. Bala kezinen balýandyq ónerge den qoıǵan ol birden dara talantymen oqshaýlandy. Áýeli 2022 jyly Rımde jasóspirimder, bıyl Sofııada jalaýy jelbiregen jastar arasyndaǵy álem birinshilikterinde jeńis tuǵyrynyń eń bıik satysyna kóterildi. Mamyr aıynda Ammanda eresekter arasynda Azııa chempıony atandy.
Zagrebtegi dúnıejúzilik dodada 63 kg salmaq dárejesinde kúsh synasqan Aıtjan sheberligimen tánti etti. 19 jastaǵy qandasymyz tusaýkeser kezdesýinde Eýropa chempıonatynyń eki dúrkin júldegeri, ýkraınalyq Aleksandr Grýshındi oısyrata utsa, shırek fınalda elimiz quramasynyń beldi múshesi, álem chempıonatynyń fınalısi, Azııa chempıony Erjet Jarylqasynovty merziminen buryn jeńdi. Jartylaı fınalda jastar arasyndaǵy álem birinshiliginiń jeńimpazy, Eýropa chempıonatynyń qola júldegeri, moldovalyq Vıtalıı Eremenkony ońaı eńsergen Aıtjan fınaldyq jekpe-jekte Ońtústik Koreıa oǵylany, Azııa oıyndarynyń qola júldegeri Handje Chýndy aıqyn basymdyqpen utty.
Jalpy, kúrestiń bul túrinen О́zbekstan balýandarynyń altyn almaǵanyna tabany kúrekteı 24 jyl bolǵan eken. Osylaısha, qazaqtyń qaısar uly A.Qalmahanovtyń arqasynda ala shapandy aǵaıyndarymyz shırek ǵasyr boıy ańsaǵan armandaryna qol jetkizdi.
