Ashylý rásiminde Májilis depýtaty, Asyq atý federasııasynyń prezıdenti Oljas Quspekov ejelden kele jatqan ulttyq oıyndy dáripteý azamattyq borysh ekenin atap ótti.
«Asyq atý oıyn ǵana emes, ol – bizdiń túp-tamyrymyz, rýhanı kodymyz ben dástúrimiz, ulttyq sport túriniń bastaýy. Onyń tarıhy tym tereńde, sonaý kóne ǵasyrlar qoınaýynda jatyr. Asyq oıyny halqymyzdyń turmys-saltymen bite qaınasqan. Týrnır – ulttyq sportty nasıhattaýdyń bir kórinisi. Biz asyq atýdy dástúr retinde ǵana emes, qoǵamdy biriktiretin zamanaýı mádenı qubylys sıpatynda damytqymyz keledi. Sebebi ulttyq sport qazaqtyń trendi bolýǵa tıis», dedi O.Quspekov.
Tartysty ótken jarys qorytyndysynda aqtóbelik Qulybek Ǵaryshbek jeńimpaz atandy. Sportshyǵa «Allur» avtomobıl kompanııasy «Chevrolet Onix» avtokóligin syıǵa tartty. Túrkistan oblysynan kelgen Ábilhan Talǵar ekinshi oryn ıelendi. Oǵan 1 mln teńge syıaqy berildi. Batys Qazaqstan oblysynyń asyq atý sheberi Slamqul Baqdáýlet úshinshi oryn alyp, 500 myń teńge qarjylaı syılyqpen marapattaldy. Odan bólek «Amanat» partııasy pavlodarlyq Jazdyqbaı Kerimge 300 myń teńge aqshalaı júlde tapsyrdy.
Jeńimpazdardy quttyqtaǵan kólik kompanııasynyń ókili Aıgúl Ahmetova «Allur» árdaıym týrnırdiń resmı seriktesi ári demeýshisi bolyp qala beretinin jetkizdi.
«Kompanııa qashanda ulttyq qundylyqtar men jasampazdyq rýhty qoldaıdy. Sonyń ishinde asyq atý oıynynyń alar orny erekshe. Biz sport pen mádenıettegi shyǵarmashylyq bastamalar arqyly ulttyq sanany jańǵyrtýdy kózdeımiz. Jarysta úzdik dep tanylǵan sportshylar – naǵyz halyqtyq dástúrdi dáripteýshiler. Olar – óskeleń urpaqqa árqashan úlgi», dedi A.Ahmetova.
