Qytaıdyń «Xi’an Jiaotong University»-de «Bir beldeý, bir jol» bastamasynyń ozyq ǵylymı-tehnologııalyq jetistikterimen almasý jónindegi halyqaralyq konferensııa uıymdastyryldy. Konferensııa aıasynda qytaılyq ýnıversıtet atynan Shákárim ýnıversıtetine «Elektrlik avtomattandyrý jónindegi Qazaqstan–Qytaı birlesken zerthanasyna» arnalǵan jabdyqtardyń alǵashqy partııasyn berý týraly estelik sertıfıkat tabystaldy. Sondaı-aq «Shákárim» qazaq-qytaı mádenı zertteýler ortalyǵynyń saltanatty ashylýy ótti. Birlesken zerthana ashý jónindegi kelisimge bıylǵy 16 maýsymda Astanada ótken «Ortalyq Azııa – Qytaı» ındýstrııalyq-ınvestısııalyq yntymaqtastyq forýmy aıasynda qol qoıylǵan bolatyn.
Mınıstrlik taratqan aqparatta kórsetilgendeı, jańadan qurylatyn zerthana eki el arasyndaǵy tehnologııa almasý men óndiristik seriktestikti damytýda mańyzdy ról atqaryp, ǵylymı jańalyqtarǵa negizdelgen ortaq ekonomıkalyq tizbektiń damýyn jyldamdatady. Jobanyń negizgi maqsaty – óńirdegi ınnovasııalardy damytý, óndiristi jańartý jáne ǵylym men óndiris arasyndaǵy baılanysty nyǵaıtý.
«Bul zerthana – ıdeıadan naqty iske aınalǵan seriktestiktiń aıqyn nátıjesi. Ǵylym men tehnologııa salasyndaǵy osyndaı yntymaqtastyq – Prezıdent Qasym-Jomart Toqaevtyń ınnovasııalyq damý jáne ıntellektýaldy ult qalyptastyrý strategııasymen úndes», dep atap ótti Ǵylym jáne joǵary bilim vıse-mınıstri Gúlzat Kóbenova.
Kezdesýdiń basty oqıǵasy Sıan Szıaotýn ýnıversıtetiniń janynan «Shákárim» qazaq-qytaı mádenı zertteýler ortalyǵynyń ashylýy boldy. Bul – uly oıshyldyń shyǵarmashylyǵy men fılosofııasyna arnalǵan sheteldegi tuńǵysh ınstıtýsıonaldy ortalyq. Halyqaralyq deńgeıde ashylǵan ortalyqtyń negizgi mindeti – Qazaqstannyń tarıhy men mádenıetin, sonyń ishinde Shákárim murasyn tereń zerdeleý, sondaı-aq birlesken bilim jáne ǵylymı zertteý jobalaryn iske asyrýdaǵy ózara tıimdi platformany qalyptastyrý, qazaq mádenıetin Qytaıda keńinen tanystyrý, eki el arasyndaǵy mádenı jáne ǵylymı baılanystardy nyǵaıtý.
Ortalyq Ǵylym jáne joǵary bilim mınıstrliginiń qoldaýymen, Shákárim ýnıversıteti men Sıan Szıaotýn ýnıversıtetiniń seriktestiginiń nátıjesinde ashylyp otyr. Kelýshiler ortalyqtan Shákárim Qudaıberdiulynyń ómiri men mol murasy týraly qazaq jáne qytaı tilderinde tolyq aqparat ala alady. Sonymen qatar qazaq halqynyń ejelgi dáýirden búginge deıingi mádenı damý kezeńderi týraly materıaldar usynylady.
Shákárim ýnıversıtetiniń rektory Dýman Orynbekov «Xi’an Jiaotong University» prezıdenti Chjan Lısıýnge jáne Ǵylym jáne joǵary bilim mınıstrligine eki eldiń akademııalyq jáne mádenı bastamalaryn senimge, ǵylymı progreske jáne ózara damýǵa negizdelgen biryńǵaı strategııaǵa biriktirgeni úshin shynaıy alǵys bildirdi.
«Shákárim» qazaq-qytaı mádenı zertteýler ortalyǵynyń ashylýy – erekshe mánge ıe tarıhı qadam. Bizdiń ýnıversıtet qazaq oıshyly Shákárimniń atynda. Sondyqtan ortalyqtyń ashylýy biz úshin úlken jetistik dep bilemin. Shákárim ýnıversıteti men «Xi’an Jiaotong University» arasyndaǵy seriktestik mádenıetter men urpaqtardy biriktiretin senim men dostyq keńistigin qalyptastyrady. Osy ortalyqty ashýǵa qyzmet jasaǵan eki ýnıversıtet qyzmetkerlerine alǵys aıtamyn. Bul ortalyq ǵylymı-mádenı jaǵynan eki eldiń jetistikterin nasıhattaýǵa qyzmet atqaratynyna senimdimin», dedi rektor.
