Topýrııalar áýletinen eki birdeı myqty sportshy shyqqannyn jankúıerler jaqsy biledi. Máselen, Aleksandrdyń týǵan inisi Ilıa aralas jekpe-jekti serik etkeli 17 kezdesý ótkizip, barlyǵynda jeńiske jetti. 15 básekede aıqyn basymdyq tanytty. Byltyr 17 aqpanda ol aýstralııalyq Aleksandr Volkanovskıdi uryp jyǵyp, jartylaı orta salmaqtyń chempıondyq belbeýin ıelendi. Qazan aıynda amerıkalyq Maks Holloýeıdi esinen tandyryp, óz ataǵyn qorǵady. Al bıyl nebári jarty mınýt aralyǵynda brazılııalyq Charlz Olıveıranyń osal tusyn ońaı taýyp, jeńil salmaqtyń chempıony atandy. Germanııada týyp-ósip, Ispanııanyń týy astynda óner kórsetip júrgen 28 jastaǵy grýzın jigiti búginde UFC-diń R4R (pound-for-pound) nusqasynda teńdessiz dep tanyldy.
Mine, osy Ilıanyń aǵasy Aleksandr Topýrııa bizdiń Bekzat Almahanǵa qarsylas. 29 jastaǵy faıter grek-rım kúresi, brazılııalyq djıý-djıtsý, boks jáne kıkboksty jetik meńgergen. Aralas jekpe-jekten ótetin jarystarǵa da ara-tura ǵana qatysyp turady. Osy kúnge deıin ol jeti ret oktagonǵa shyǵyp, alty ret jeńiske jetti. Bes básekeni merziminen buryn aıaqtady. Aleksandr kezdesýleriniń basym bóligin Ispanııada ótkizip, Andreas Chıgýano, Alehandro Rýmın, Lýkas Tenorıo, Alberto Ibanez jáne Iohann Segasqa san soqtyrdy. Osydan 10 jyl buryn ol bolgarııalyq Ivo Ivanovtan utyldy.
Bıyl Aleksandr Topýrııa UFC-men kelisimshartqa otyryp, Aýstralııanyń Sıdneı qalasynda uıymdastyrylǵan alǵashqy kezdesýinde jergilikti sportshy Kolbı Tıknespen kúsh synasty. Bul báseke grýzııalyq faıterdiń jeńisimen aıaqtaldy.
Bekzat jaıynda aıtar bolsaq, onyń jasy 27-de. Jambyl oblysy Baızaq aýdanynyń týmasy. Sherdogi – 14 jekpe-jek, 12 jeńis. «Turan áskeri» degen búrkenshik esimdi tańdaǵan qandasymyz 10 qarsylasyn nokaýtpen, bir ret «sabmıshn» tásilimen jeńdi. Byltyr UFC-degi tusaýkeser kezdesýin Almahan dańqy jer jarǵan Habıb Nurmaǵamedovtiń inisi Ýmarǵa qarsy ótkizdi. Báseke barysynda ony nokdaýnǵa da jiberdi. Biraq aqyrynda upaı sanymen utyldy. Esesine Bekzat bıyl mamyrda Kanadanyń Monreal qalasynda ótken aıqasta Úıeńki japyraqtar eliniń ókili Bred Katonany kesken terekteı sulatyp saldy. Qazaqtyń qaısar ulyna osyndaı jarqyn jeńiske qol jetkizý úshin nebári 1 mınýt 4 sekýnd jetkilikti boldy.
Parsy shyǵanaǵynda jalaýy jelbireıtin jarysta Bekzat baýyrymyzǵa sáttilik tileımiz. Aleksandr Topýrııany jeńýge onyń kúsh-jigeri jetetinine senimdimiz. Qandasymyz nokaýtpen utyp jatsa, oǵan da tańdanbaımyz. Sondaı-aq dál sol týrnırde qazaqtyń taǵy bir tegeýrindi sportshysy Asý Almabaev ta óner kórsetedi. Sol keshte «Zulpyqar» amerıkalyq Aleks Perespen aıqasady.
