Foto: JI/ ru.freepik.com
Keńeste otandyq kásiporyndardyń jobaǵa qatysýy, tehnologııalar transferti, jergilikti ónerkásipti qoldaý jáne jańa jumys oryndaryn qurý jaıy talqylandy.
Qatysýshylar AES qurylysy barysynda shyǵyndardyń edáýir bóligi qosalqy ınfraqurylymǵa, ınjenerlik júıelerge, materıaldar men servısterdiń keń aýqymyna baǵyttalatynyn anyqtady. Bul qurylysqa qazaqstandyq óndirýshiler men merdigerlerdi keńinen tartýǵa múmkindik bermek.
Sondaı-aq atom energetıkasy salasy úshin taýar jetkizýshilerdiń, jumystar men qyzmet atqarýshylardyń arnaıy tizilimi jasaqtalady.
Bul tizilim rásimderdiń ashyqtyǵyn, sapany baqylaýdy jáne jobaǵa qatysýǵa teń qoljetimdilikti qamtamasyz etedi.
Keńes barysynda AES qurylysy kezinde oqshaýlaýdy damytýdyń keshendi jospary jobasynyń negizgi elementteri tanystyryldy. Onda qazirgi jaǵdaıǵa taldaý, oqshaýlaýdyń perspektıvalyq baǵyttary, ónerkásipti damytýdy yntalandyrý tetikteri jáne memlekettik qoldaý sharalary qamtylǵan.
«Biz tek bilikti jáne senimdi qyzmet kórsetýshilerdi tartýǵa múmkindik beretin júıe qalyptastyryp jatyrmyz. Bul – atom jobalarynyń qaýipsizdigi men tıimdiliginiń negizi. Keshendi jospardy iske asyrý otandyq ónerkásip kásiporyndarynyń edáýir bóligin jańǵyrtýǵa, júzdegen otandyq kompanııany jetkizilim tizbegine tartýǵa, myqty baza qalyptastyrýǵa jáne jańa óndiristerdiń ashylýyna múmkindik beredi. Sondaı-aq shaǵyn jáne orta bıznestiń damýyna, jańa jumys oryndarynyń qurylýyna jáne óńirlik ınfraqurylymnyń jaqsarýyna úles qosady», dedi Agenttik tóraǵasy A. Sátqalıev.
Jıyn qorytyndysy boıynsha ónerkásip pen qurylys sektorynyń jaǵdaıyna tereń taldaý júrgizý týraly sheshim qabyldandy. Memlekettik organdarǵa keshendi jospar jobasyn qarastyryp, óz usynystaryn engizý tapsyryldy.
