Foto: Qaraǵandy oblysynyń ákimdigi
Tekserý barysynda joldardyń tehnıkalyq talaptarǵa sáıkestigi anyqtaldy. Sondaı-aq qysqa daıyndyq, joldardy qardan tazalaý jáne qolaısyz aýa raıy kezinde ýchaskelerdi ýaqytyly jabý jumystaryn uıymdastyrý nazarǵa alyndy.
Taldap-tekserý nátıjesinde oblys arqyly ótetin respýblıkalyq mańyzy bar avtojoldardyń jeti ýchaskesinde jol-kólik oqıǵalary jıi tirkeletini belgili boldy.
Osyǵan baılanysty polısııa qyzmetkerleri «Qazavtojol» mamandarymen birge atalǵan ýchaskelerde arnaıy eskertý belgilerin ornatýǵa kirisken.
«Respýblıkada alǵash ret Qaraǵandy oblysynda jol shetine qyzyl jolaq belgisin saldyq. Bul belgi Qaraǵandy-Qarqaraly tasjolynda ornatyldy. Sebebi buǵan deıin dál osy ýchaskede eki kólik soǵysyp, bes adam qaza tapqan edi. Qyzyl jolaq júrgizýshilerdiń nazaryn aýdaryp, ásirese túngi ýaqytta, qar astynan da jaqsy kórinedi. Jolaq júrgizilgennen beri bul ýchaskede birde-bir jol-kólik oqıǵasy tirkelgen joq», dedi tekserýge qatysqan Qaraǵandy oblysy Polısııa departamenti bastyǵynyń orynbasary Jasqaırat Qaıyrov.
О́ńir joldarynda qys mezgilinde qaýipsizdikti saqtaý, qaıǵyly oqıǵalardyń aldyn alý úshin respýblıkalyq tasjoldarǵa úlken aqparattyq ekrandar ornatyla bastaǵan. Onda oblystyń ár aýmaǵyndaǵy aýa raıy kórsetkishteri nazarǵa usynylyp turady.
«Mysaly, Temirtaýda jol jabylǵanda keptelis týyndamaýy úshin Balqashta da qozǵalysty shekteý qajet bolýy múmkin. Júrgizýshiler ózi turǵan aýmaqta kún ashyq bolǵandyqtan shekteý mánin túsinbeı jatady. Sondyqtan ekrandar arqyly naqty jaǵdaı kórsetiledi. Sonymen qatar, bizdiń usynysymyzben respýblıkalyq joldarǵa elektrondy jyldamdyq belgileri de ornatyldy. Jyldamdyq rejımi aýa raıyna baılanysty avtomatty túrde ózgerip otyrady. Qolaısyz aýa raıy kezinde jyldamdyq 80-60 km/saǵatqa deıin tómendetiledi», dedi Jasqaırat Qaıyrov.
