Búgin uıymdastyrylǵan dıalog-platformasynda Prezıdentke tikeleı suraq qoıýǵa múmkindik týdy, sondaı-aq qoıylǵan suraqtardyń naqty jaýabyn estý múmkin boldy. Memleket basshysy aldaǵy jyldary ákimderdiń jumysyn jeńildetýge, jergilikti basqarýdy kúsheıtýge baǵyttalǵan zańnamalyq ózgerister týraly aıtty. Sonyń ishinde tórtinshi deńgeıli bıýdjetke qatysty máseleler erekshe ataldy. Iаǵnı aýyldardyń óz-ózin qamtamasyz etýi úshin túsetin salyqtardyń bir bóligi aýyl deńgeıinde qalýǵa tıis ekeni aıtyldy.
Buryn iri korporasııalardan túsetin ekologııalyq jáne korporatıvtik salyqtar oblys nemese respýblıkalyq deńgeıde qalyp qoıatyn. Prezıdent bul salyqtardyń belgili bir bóligin aýdan men aýyl deńgeıinde qaldyrýdy tapsyrdy. Sondaı-aq proporsıonal túrde ádil esepteý kerektigi de basa aıtyldy. Meniń qoıǵan suraǵym da osy máselege qatysty boldy. Bizdiń aýyldyń mańynda «Aıs» dep atalatyn sút óndiretin iri taýarly-ferma bar. Olar bizge óte az mólsherde – tek tabys salyǵynyń 0,5 paıyzy kóleminde ǵana tólem jasaıdy. Jer salyǵy men tabys salyǵy da jeńildetilgen rejimde bolǵandyqtan, aýyl bıýdjetine aıtarlyqtaı qarjy túspeıdi. Qyzmettik kólikter men tehnıkalardan túsetin salyqtardyń da shaǵyn bóligi ǵana aýylǵa qalady. Basqa salyqtar múldem túspeıdi.
Osy sebepti biz tabys salyǵynyń belgili bir paıyzyn aýyl deńgeıinde qaldyrý týraly máseleni kóterdik. Eger aýylǵa túsetin salyqtyq túsim mólsheri artsa, kóptegen qajetti jumys pen máselelerdi óz kúshimizben sheshýge múmkindik bolar edi. Prezıdent bul másele boıynsha Úkimetke tikeleı tapsyrma berdi. Meniń oıymsha, osy suraqtyń ózi-aq ákimder úshin, aýylǵa baryp jumys isteýge úlken serpin beredi.
Medet BEKJANOV,
Táńirbergen aýyldyq
okrýginiń ákimi
Aqtóbe oblysy,
Mártók aýdany
