Búgin «Prezıdentke hattar» Telegram arnasynda tanymal jýrnalıst Gúlnar Bajkenovanyń páterinde, sondaı-aq Orda portalynyń redaksııasynda tintý ótip jatqany belgili boldy.
«Bajkenovaǵa qatysty Almatydaǵy bıznes-ortalyqtyń ıesi men óńirlik balyq ınspeksııasynyń qyzmetkeri tarapynan jalǵan aqparat taratý boıynsha birneshe aryz tústi», delingen habarlamada.
Bajkenovaǵa qatysty birneshe márte jáne ádeıi jalǵan aqparat taratý faktileri boıynsha qylmystyq is qozǵalǵan.
«Tergeý barysynda aryzdanýshylardyń ýájderi muqııat tekserilip jatyr. Aldyn ala derek boıynsha, 2024 jylǵy jarııalanymdardyń birinde quqyq qorǵaý organy qyzmetkeriniń para alǵan kezde ustalǵany týraly jalǵan aqparat ádeıi taratylǵan. Alaıda bul derek shyndyqqa janaspaıtyny naqty anyqtaldy. Osylaısha, B. tarapynan atalǵan jarııalanymdaǵy qyzmetkerdiń kásibı bedeline nuqsan kelip, qoǵamda onyń jumysyna qatysty jalǵan túsinik qalyptasqan.
Taǵy bir jarııalanymda múliktik daýǵa qatysty zalaldyń mólsheri men sebepteri týraly burmalanǵan ári shyndyqqa sáıkes kelmeıtin aqparat berilgen, bul qoǵamdy jańylystyryp, aryzdanýshynyń iskerlik bedeline aıtarlyqtaı nuqsan keltirgen», dep jaýap berdi polısııa.
Sondaı-aq ótken jyldardaǵy basqa da materıaldarǵa qatysty jábirlenýshilerdiń aryzdary boıynsha tergeý júrgizilip jatyr. Olarda da jalǵan nemese qoǵamdy adastyratyn málimetter bolýy múmkin.
Budan bólek, Polısııa departamenti tintý júrgizilgenin rastap, Bajkenovanyń úıinen, sondaı-aq Orda redaksııasynan qurylǵylar tárkilengenin habarlady.
«Azamatsha B.-nyń turǵylyqty jeri men jumys ornynda tergeý is-qımyldary júrgizilip jatyr. Jarııalanǵan jalǵan aqparattyń daıyndalýy men taralýynyń mán-jaıyn anyqtaý, sondaı-aq olardyń qaıdan shyqqanyn tekserý úshin elektrondyq qurylǵylar men materıaldar alyndy. Tergeý jalǵasady. Istiń barlyq mán-jaıy zań aıasynda anyqtalady», dep qosty vedomstvo.
Aıta keteıik, ázirge Orda redaksııasy da, Gúlnar Bajkenova da resmı málimdeme jasaǵan joq.
Basylym saıtynda Gúlshat Bajkenova (jýrnalıstiń shyn esimi) Orda-nyń negizin qalaýshysy, quryltaıshysy jáne bas redaktory ekeni kórsetilgen. Sondaı-aq ol 2020 jyly tirkelgen «OrdaMedia.kz» JShS dırektory.
