Almaty qalasyndaǵy Ulttyq kitaphanada ótken is-sharaǵa Prezıdentiniń keńesshisi Málik Otarbaev, aqyn-dramatýrg, memleket jáne qoǵam qaıratkeri Nurlan Orazalın, Almaty oblysy ákiminiń orynbasary Ǵanı Maılybaev, Almaty qalasy Mádenıet basqarmasynyń basshysy Danııar Álıev, jýrnaldyń alǵashqy bas redaktory, jazýshy Batyq Májıtuly, Qazaqstannyń halyq jazýshysy Smaǵul Elýbaev, qoǵam qaıratkeri Rysbek Sársenbaı, aqyn ári kompozıtor Saǵatbek Medeýbekuly jáne ózge de tanymal qalamgerler qatysty.
Kesh barysynda Qazaqstan Jazýshylar odaǵynyń Basqarma Tóraǵasy Mereke Qulkenov mereıtoı ıelerine quttyqtaý sóz arnap, jýrnaldyń ádebı keńistiktegi róline joǵary baǵa berdi. Mereke Qulkenov: «Jıyrma jyl – ádebı basylym úshin az ýaqyt emes. Osy kezeń ishinde jýrnal Muqaǵalı Maqataevtyń poetıkalyq murasyn keńinen nasıhattap qana qoımaı, qazaq poezııasynyń órisin keńeıtýge, jas daryndardy tanytýǵa, rýhanı qundylyqtardy dáripteýge eleýli úles qosty», dedi óz sózinde.
Muqaǵalımen birge Qazaq radıosynda dıktorlyq qyzmet atqarǵan Baqytjan Atakeldıevtiń oqyǵan jyrlary keshtiń kórkem bolmysyn tereńdete tústi. Sondaı-aq aqynnyń uly Juldyz Maqataev pen kelini Baqytkúl Aıdarova jýrnal ujymyna júrekjardy yqylastaryn bildirip, aq tilekterin jetkizdi.
Mereıtoı qurmetine belgili ánshi, «Qurmet» ordeniniń ıegeri Sulýshash Nurmaǵambetova aqynnyń «Sarjaılaý» ánin oryndap, keshtiń sánin kirgizdi.
Is-shara sońynda «Muqaǵalı» jýrnalynyń qazirgi bas redaktory, Qazaqstannyń eńbek sińirgen qaıratkeri, «Qurmet» ordeniniń ıegeri Dúısen Maǵlumov basylymnyń búgingi baǵyt-baǵdary men bolashaqtaǵy josparlaryna toqtalyp, oqyrmanǵa qyzmet etýdi jalǵastyra beretinin aıtty.
Ulttyq kitaphanada ótken bul mereıtoı zııaly qaýym, aqyn-jazýshylar, mádenıet jáne BAQ ókilderiniń basyn qosyp, «Muqaǵalı» jýrnalynyń el rýhanııatyndaǵy orny men mıssııasyn taǵy bir márte aıǵaqtaǵan erekshe kesh retinde este qaldy.
