Mınıstrdiń aıtýynsha, kólikte ınternetti engizý jumystary kelesi jyldan bastap bastalmaq.
«Air Astana ushaqtarynda jáne "QTJ" poıyzdarynda ınternet kelesi jyldan bastap paıda bola bastaıdy. Bizdiń baǵalaýymyz ben josparymyz boıynsha, kelesi jyldyń birinshi jartyjyldyǵynda poıyz jolaýshylarynyń shamamen 50 paıyzy spýtnıktik ınternetke qol jetkize alady. Al kelesi jyldyń qazan aıynan bastap Air Astana áýe kompanııasynyń keıbir ushaqtarynda spýtnıktik ınternetke qosylý múmkindigi bolady», dedi mınıstr.
Onyń sózinshe, spýtnıktik ınternet tehnologııalary búginde qoljetimdi, alaıda qazaqstandyq áýe kompanııalary ony ázirge qoldanbaı otyr. Al Qazaqstanǵa reıs oryndaıtyn birqatar sheteldik tasymaldaýshylar, onyń ishinde Turkish Airlines, bul qyzmetti burynnan usynyp keledi.
Mınıstr Air Astana kompanııasy qajetti jabdyq ornatylǵannan keıin áýe kemelerinde ınternetti engizýdi bastaýdy josparlap otyrǵanyn aıtyp, jobanyń júzege asý merzimine oń baǵa beretinin jetkizdi.
