Tigin kesheniniń ishki tynysy, jumysshylarǵa jasalǵan jaǵdaı men eksporttyq baǵyttardy bilmekke óndiris alańyn aralap, mamandarmen áńgime qurdyq. Áýeli daıyn ónim shyǵaratyn negizgi bólimderdiń birine bas suqtyq. Mundaǵy tynys-tirshilikti óndiristik seh sheberi Nuraı Janpeıis táptishtep aıtyp berdi.
«Bizdiń sehta 75–80 adam eńbek etedi. Negizgi baǵytymyz – klassıkalyq úlgidegi formalyq pıdjak pen shalbar túrlerin daıyndaý. Jumys tańǵy saǵat 8-den keshki 17-ge deıin sozylady. Osy 8 saǵattyq aýysymda sheberhanadan 350 shaqty daıyn ónim shyǵarylady», dedi ol.
Kásiporynda qyzmetkerlerdiń qaladan qatynaýy tolyq sheshilgen, avtobýs qarastyrylǵan. Ujymǵa kompanııa esebinen ystyq as beriledi. Tiginshilerdiń tabysy atqarǵan isine qaraı tólenedi, bastapqy eńbekaqy 200–250 myń teńge kóleminde.
«Buǵan qosa toqsan saıyn beriletin syıaqy júıesi bar, nátıjeli eńbek kórsetkender jaqsy bonýs alady. Men bul jerde 7 jyldan beri eńbek etip kelemin. Tiginshi bolyp bastap, tájirıbe jınaqtap, sheber laýazymyna deıin kóterildim. Demek, munda jas mamandardyń ósýine zor qoldaý kórsetiledi», deıdi sheber.
Mundaǵy ónim tek elorda naryǵymen shektelmeıdi, Reseıge, taǵy basqa elderge eksportqa jóneltiledi. Shıkizatty tapsyrys sıpatyna qaraı otandyq óndirýshilerden jáne keden odaǵyna kiretin kórshi elderden de alady.
Úzdiksiz jumys istep turǵan mashınalardyń arasynan Otyzgúl Qanaıqyzy esimdi kópbalaly anany áńgimege tarttyq. Ol óziniń mamandyǵy basqa bolsa da, osy jerge kelip, úlken ónerdi ıgergenin maqtanyshpen jetkizdi.
«Birinshi sehta 7 jylǵa jýyq ýaqyttan beri tiginshi bolyp jumys istep kelemin. Bul saladan habarym az bolsa da, janym qalaǵan is ekenin bilgende qysqa ýaqytta tigýdiń qyr-syryn úırenip kettim. Munda barlyq jaǵdaı jasalǵan, ózime óte unaıdy», deıdi tiginshi.
Fabrıkada mindetti medısınalyq saqtandyrý paketi qarastyrylǵan. Belgilengen ýaqyttan artyq saǵat jumys istegen kúnderi densaýlyqqa qoldaý retinde aıran-sút beriledi eken. Tigin mashınalary zamanaýı, yńǵaıly, jumys isteýge esh qıyndyq týdyrmaıdy.
«Tórt balanyń anasy, 10 nemereniń ájesimin, osy eńbegimmen otbasymdy asyrap otyrmyn. Aılyq tabysymyz turaqty, jaqsy jumys istep, ónimdilikti arttyrǵan kezde 300 myń teńgege jýyq tabys tabýǵa múmkindik bar», dedi O.Qanaıqyzy.
Kásiporynnyń jalpy óndiristik qýaty, jabdyqtalýy, jańa tehnologııalardy ıgerý barysy men kadr daıarlaý máselesi aýqymdy mindet júktep tur. Fabrıkanyń tynysyn keńinen ashý maqsatynda óndiris basshysy Dinaısha Bektibaımen tildestik.
«Qazir reseılik kompanııanyń úlken tapsyrysyn oryndap jatyrmyz. Olarǵa arnap klassıkalyq úlgidegi formalyq ári qysqy maýsymdyq kıim tigý qolǵa alyndy. Kelisimshartta naqty merzim kórsetilgendikten, arnaıy jospar quryp, ónimdi ýaqytynda jóneltip otyramyz», dedi óndiris basshysy.
О́ndiriste zamanaýı tehnıkaǵa, jańa tehnologııalarǵa basa mán berilgen. 2023–2024 jyldary zamanaýı avtomattandyrylǵan qondyrǵylar negizinde shablondyq seh jumys isteıdi eken. Bul jabdyqtar tigis sapasynyń 99 paıyz joǵary bolýyn jáne eńbek ónimdiliginiń artýyn qamtamasyz etetin kórinedi.
«Mamandardy daıarlaý isine kelsek, arnaıy kolledjdermen dýaldy oqytý júıesimen tyǵyz baılanys ornatqanbyz. Stýdentter oqý barysynda bizde tájirıbeden ótip, keıin turaqty jumysqa qalady. Al bul salaǵa múldem qatysy joq, biraq tigin ónerin úırengisi keletin azamattar úshin arnaıy oqý sehy ashylǵan. Onda 3–5 kún ishinde mashınamen jumys isteýdi, tigis túrlerin úıretip, negizgi sehtarǵa jiberemiz», dedi D.Bektibaı.
Onyń aıtýynsha, jumysshylardyń áleýmettik jaǵdaıy nazardan tys qalmaǵan, túski as pen tús aýa bestiń shaıy kompanııa esebinen tegin beriledi. Jyl sońynda nemese ár 90 kún saıyn nátıjeli jumys úshin syıaqy tólenedi. Eger qyzmetker otbasy qıyn jaǵdaıǵa tap bolsa, kompanııa tarapynan materıaldyq kómek, arnaıy járdemaqy eseptelip beriledi.
«Biliktilikti arttyrý maqsatynda sheberlerimizdi Qytaıǵa, Reseıge oqýǵa jiberip turamyz. El ishinde de Shymkent qalasyndaǵy áriptestermen turaqty túrde tájirıbe almasý jolǵa qoıylǵan», deıdi óndiris basshysy.
Tigin sheberhanasymen tanysý barysynda elordalyq ónimderdiń básekege qabiletti ekenine kóz jetkizdik. Ishki naryqty qamtamasyz etip, syrtqy elderge de ónim shyǵaryp otyrǵan kásiporynnyń jumysy – otandyq jeńil ónerkásiptiń ilgeri basqanynyń aıqyn kórinisi.
