Aýyl adamdarynyń qýanyshyna oblys ákimi Ashat Shaharov ta ortaqtasyp, saltanatty rásimge arnaıy keldi. «Biz búgin Aqkemer men Kemer aýyldary turǵyndary kópten kútken qýanyshty oqıǵanyń kýási bolyp otyrmyz. Bul joba «О́ńirlerdi damytý» baǵdarlamasy aıasynda júzege asyrylyp otyr. Nátıjesinde, 378 adam turatyn 71 úı men úsh áleýmettik nysan tabıǵı gazǵa qosyldy. Osy maqsatta óńirde josparlanǵan jobalardy kezeń-kezeńimen iske asyra beremiz», deıdi óńir basshysy.
Tórt júzge jýyq turǵyny bar Aqkemer aýyly osydan eki jyl buryn sý tasqynynyń zardabyn kórdi. Sáýirde Oıyl ózeni arnasynan asyp, aýyl adamdarynyń úıleri men sharýashylyq qurylysy, qora-qopsysy búlinip, daǵdaryp qaldy. Degenmen, eldiń birligi men memlekettiń qoldaýy arqasynda apattyń zardaby qysqa merzim ishinde joıylyp, 16 jańa turǵyn úı boı kóterdi, joldar men mektep qalpyna keltirildi. Endi turǵyndardyń turmysyn jaqsartýǵa baǵyttalǵan taǵy bir mańyzdy qadam retinde aýylǵa kógildir otyn jetti. Gaz qubyrynyń aýylishilik jelisine alǵashqy bolyp Aqkemer aýylynyń turǵyny, «Darhan-1» sharýa qojalyǵynyń jetekshisi О́temis Qojaǵalıevtiń úıi qosyldy. Aýyldyń ózge de turǵyndary kógildir gazdyń ıgiligin kóre bastap, qýanysyp jatyr.
«Men osy aýylda 35 jyldan beri turamyn. Osynda týyp-óstim. Gazdyń kelýi bárimizge úlken qýanysh boldy. Buryn eski úıimizdi tezek pen kómir jaǵyp jylynatynbyz. Otyndy aldyn ala daıyndap, peshti únemi baqylap otyrý kerek edi. Eki jyl buryn jańa úıge kóshsek te, pesh jaǵýdy jalǵastyrdyq. Endi gazdyń kelýimen ómirimiz aıtarlyqtaı jeńildeıdi. Úıimiz jyly ári taza bolady, otyn daıyndaýǵa ketetin ýaqyt pen kúshten qutylamyz. Bul tek qolaılylyq qana emes, otbasy bıýdjetin únemdeýge de múmkindik beredi», dedi Aqkemer aýylynyń turǵyny Saltanat Sapıeva.
Jasy seksenge taıaǵan zeınetker Jumaǵul Nurǵalıeva da osynaý ıgilikti iske úles qosqan azamattarǵa alǵysyn bildirdi.
«Meniń bar ǵumyrym osy aýylda ótti. Balalarymdy ósirip, 2002 jyly zeınetke shyqtym. Buryn qysta óte qıyn bolatyn. Úıdegi peshke túnde de turyp, otyn nemese kómir salýǵa týra keletin. Qys mezgilinde otynǵa shamamen 180 myń teńge jumsaıtynbyz. Sonymen qatar kúl shyǵaryp, otty únemi baqylaýda ustaý qajet edi. Sondyqtan gazdyń kelýi – biz úshin úlken jeńildik. Endi úıimiz jyly ári jaıly bolady. Osy armanymyzdyń oryndalýyna úles qosqan barlyq azamatqa alǵys bildiremin», dedi aýyl turǵyny.
Osy kúni Aqkemerge jaqyn 770 turǵyny bar Kemer aýylynda da gaz qubyryn qosý rásimi boldy. Kógildir otyn aýyldyń 159 úıi men áleýmettik nysanyna jetkizildi. «ASK–7 NS» JShS 207,3 mln teńgege Aqkemerden Kemerge gaz qubyryn tartty. Bul aýylda gaz jelisi eń birinshi bolyp oblystyq «Mereıli otbasy» baıqaýynyń jeńimpazy, «Spartak» sharýa qojalyǵynyń basshysy Spartak Tóremuratovtyń shańyraǵyna qosyldy. Aýyldyń búgingi jańa tynysyna Kemer turǵyny Kenjebaı Qazmaǵambetov joǵary baǵa berdi.
«Biz basqa aýyldardyń gazǵa qosylyp jatqanyn kórip, «shirkin-aı, bizge gaz qashan keler eken?» dep armandaıtynbyz. Mine, sol armanymyz oryndaldy. Qazir bizdiń jaǵdaıymyz qaladan kem emes. Jolymyz bar, aýyzsý men elektr jaryǵy úzdiksiz beriledi. Internet turaqty jumys isteıdi. Qalaǵa nebári eki saǵatta jete alamyz. Bolyp jatqan oń ózgeristerge óte rızamyz. El Prezıdentine jáne oblys ákimine aýyl turǵyndaryna kórsetip otyrǵan qamqorlyǵy men qoldaýy úshin alǵys aıtamyz», deıdi aýyl turǵyny.
Aýyl ishine ornatylǵan gaz ınfraqurylymynyń sapasyn oblys basshysy Ashat Shaharov pen aýyl aqsaqaldary birge aralap kórdi. Kógildir otynnyń kelýi turmystyq jeńildik qana emes, sonymen qatar kásipkerliktiń, ásirese sharýa qojalyqtarynyń jumysyn jandandyrýǵa úlken serpin bermek. Jalpy, Aqtóbe óńirindegi eldi mekenderdi gazdandyrý jumysy munymen toqtap qalmaıdy. Oblys ákimdiginiń málimetinshe, jyl sońyna deıin josparlanǵan aýyldarǵa da kezeń-kezeńimen tabıǵı gaz jetkiziledi. Bul – «Aýyl – el besigi» men óńirlerdi damytý baǵdarlamasy boıynsha iske asyrylǵan joba.
Aqtóbe oblysy
