Asa aýylynyń turǵyny Darhan Nurmahanov oblys ákimi Erbol Qarashókeevtiń qolynan jańa páterdiń kiltin alyp tur.
Aldymen Jambyl aýdanynyń ortalyǵy Asa aýylyndaǵy 120 páterli turǵyn úıde asyraýshysynan aıyrylǵan azamattar, I jáne II toptaǵy múgedektigi bar jandar jáne ózge de áleýmettik sanattaǵy otbasylar baspana kiltine ıe boldy. Júzderinen shattyq lebi sezilgen jańa qonys ıelerine qajetti turmystyq tehnıkalar da tartý etildi.
Is-sharada alǵash bolyp sóz alǵan Jambyl oblysynyń ákimi Erbol Qarashókeev Memleket basshysy Qasym-Jomart Toqaevtyń azamattardy turǵyn úımen qamtamasyz etý jónindegi tapsyrmasy óńirde júıeli túrde júzege asyrylyp jatqanyn atap ótti. Sondaı-aq Otbasy bank arqyly baspanaly bolǵan otbasylar sany jyl saıyn artyp kele jatqanyn jetkizdi.
Lázzat Ibragımova kópbalaly ana Jámıla Jaıylǵanovaǵa páter kiltin tapsyrdy.
– Búgin turǵyn úı kezeginde turǵan kóptegen otbasy jaldamaly páter kiltin alyp otyr. Bul – barshańyz úshin úlken qýanysh. Osy is-shara úshin arnaıy Astanadan keldim. Shańyraqtaryńyzdan shattyq ketpesin, balalaryńyzdyń qyzyǵyn kórińizder. Úkilep ósirgen ul-qyzdaryńyz el senimin aqtap, abyroıly azamat bolyp óssin. Tek jaqsylyqta júzdeseıik, – dedi Lázzat Ibragımova jańa qonys ıelerin quttyqtap.
Asa aýylyndaǵy jańa turǵyn úıden páter alǵandardyń arasynda múmkindigi shekteýli azamattar da bar. Solardyń biri – Darhan Nurmahanov. Ol turǵyn úı kezegine úsh jyl buryn tirkelgen. Búginde kópten kútken baspanasyna qol jetkizip otyr.
– Men 2023 jyly densaýlyǵyma baılanysty turǵyn úı kezegine turǵan bolatynmyn. Ekinshi toptaǵy múgedektigi bar azamat retinde aýyr jumys isteýge múmkindigim joq. Úsh jyl buryn kezekke turǵan kezde baspanaly bolatynyma asa sene qoımaǵan edim. Bir aı buryn habarlama kelip, qajetti qujattardy rásimdeýge kiristim. Búgin, mine, Otbasy bank arqyly úsh bólmeli páterdiń kiltin alyp otyrmyz.
Jańa páter kiltin alǵan baqytty jandar - Galına Mıhaılovskaıa, Kósherbaı Izentaev, Tatıana Soboleva, Ásel Aqanova.
Qazirgi qýanyshymdy sózben jetkizý qıyn. Qumtıyn aýylynan aýdan ortalyǵyna qonys aýdaryp jatyrmyz. Eń bastysy, jaldamaly páterdiń tólemaqysy qoljetimdi. Onyń ústine, bolashaqta bul baspanany satyp alý múmkindigi qarastyrylǵan. Aldaǵy ýaqytta osy múmkindikti paıdalanyp, úıdi óz atyma rásimdeýge kúsh salamyn.
Osyndaı múmkindik jasap otyrǵan memleketke, jergilikti bılik ókilderine jáne bank basshylyǵyna alǵysym sheksiz. Birden baspana satyp alýǵa jaǵdaıy kelmeıtin ózimiz sekildi kópbalaly jáne áleýmettik osal otbasylar úshin bul óte mańyzdy qoldaý dep esepteımin, – deıdi Darhan Nurmahanov.
Resmı málimetke súıensek, Asa aýylyndaǵy «Báıterek» turǵyn alabynda boı kótergen turǵyn úıdiń qurylysyn «Taraz Qurylys Dızaın» JShS júrgizgen. Bes qabatty úıde 10 bir bólmeli, 62 eki bólmeli jáne 48 úsh bólmeli páter bar. Turǵyndardyń jaıly ómir súrýi úshin barlyq qajetti jaǵdaı jasalǵan.
Jańa páterge qonystanǵan turǵyndardyń qýanyshynda shek joq. Solardyń biri – Jámıla Jaıylǵanova.
– Búgin otbasymyz úshin umytylmas kún bolyp otyr. Kópten kútken armanymyz oryndaldy. Segiz balamyzdyń nesibesi shyǵar, úsh bólmeli páter buıyrdy. Osyndaı múmkindik bergen oblys jáne aýdan basshylyǵyna, Otbasy bank ujymyna shynaıy alǵysymdy bildiremin, – deıdi ol.
Gúlsara Rahımova men Lázzat Ibragımovanyń áserli qushaqtasý sáti.
Bul kúni Taraz qalasyndaǵy Uly dala shaǵyn aýdanynyń Qyz Jibek kóshesinde ornalasqan jańa turǵyn úı de paıdalanýǵa berildi. Munda áleýmettik osal sanattaǵy azamattarǵa, atap aıtqanda, tolyq emes jáne kópbalaly otbasylarǵa, erekshe qajettiligi bar bala tárbıelep otyrǵan otbasylarǵa, sondaı-aq I jáne II toptaǵy múgedektigi bar azamattarǵa páterler tapsyryldy.
Jańa qonys ıelerine Jambyl oblysynyń ákimi Erbol Qarashókeev pen Otbasy bank basqarma tóraǵasy Lázzat Ibragımova páter kiltterin saltanatty túrde tapsyrdy.
Otbasy bank basqarma tóraǵasy Lázzat Ibragımovanyń aıtýynsha, halyqtyń áleýmettik osal toptaryn turǵyn úımen qamtamasyz etý jumystary kezeń-kezeńimen jalǵasady.
– Búgin Taraz qalasyndaǵy Uly dala shaǵyn aýdanynyń Qyz Jibek kóshesinde ornalasqan 169 jaldamaly páterdiń kilti tapsyryldy. Munda on jyldan astam ýaqyt boıy turǵyn úı kezeginde turǵan azamattar baspanaly boldy. Olardyń qatarynda kópbalaly otbasylar, erekshe qajettiligi bar balalardy tárbıelep otyrǵan ata-analar, I jáne II toptaǵy múgedektigi bar azamattar men tolyq emes otbasylar bar.
Jańa turǵyn úıden baspanaly bolǵandardyń shamamen 70 paıyzy osy sanattarǵa jatady. Turǵyn úı kezeginde turǵan jáne túgendeý rásiminen ýaqtyly ótken azamattardyń barlyǵy arnaıy portal arqyly ótinim berip, qajetti qujattaryn rásimdedi. Búginde olar jaldaý sharttaryna qol qoıyp, jańa páterleriniń kiltterin aldy.
Qazirgi tańda Jambyl oblysynda turǵyn úı kezeginde shamamen 60 myń adam tur. Búginde 2016–2017 jyldary kezekke turǵan azamattardy baspanamen qamtamasyz etý jumystary júrgizilip keledi. Bul másele kezeń-kezeńimen sheshimin tabatyn bolady.
2026 jyly elimiz boıynsha jalǵa beriletin jáne nesıelik turǵyn úıler sany rekordtyq deńgeıge jetti. Qazirgi ýaqytqa deıin shamamen 12 myń páter paıdalanýǵa berilip, olardy bólý jáne tapsyrý jumystary júrgizilip keledi. Jyl sońyna deıin taǵy 8 myńǵa jýyq páterdi paıdalanýǵa berý josparlanǵan. Jalpy alǵanda, bıylǵy kórsetkish keıingi jyldardaǵy eń joǵary nátıjelerdiń biri bolyp otyr, – dedi Lázzat Ibragımova.
Jambyl oblysy
