Qazaq rejısseri Elzat Eskendirdiń "О́liara" ("Off-season") fılmi Ońtústik Koreıanyń Pýsan qalasynda ótken dástúrli kınofestıvalde úzdik qysqametrajdy fılm dep tanyldy.
Busan International Film Festival (BIFF) - Azııa kınoındýstrııasynda ǵana emes, álemde shoqtyǵy bıik kınobaıqaý. BIFF kınofestıvalinde elimizdiń jas kınogeri Elzat Eskendirdiń "О́liara" ("Off-season") qysqametrajdy fılmi Sonje Award atalymynda úzdik kartına dep tanyldy. Sondaı-aq rejısser 10 myń AQSh dollary kóleminde aqshalaı syıaqy aldy.
21 jyldyq tarıxy bar Halyqaralyq Pýsan kınofestıvalinde World Premiere-sy (álemdik premerasy) ótken "О́liara" fılminiń qoıýshy rejıssery Elzat Eskendir - Temirbek Júrgenov atyndaǵy Qazaq ulttyq óner akademııasynyń túlegi, Iraklıı Kvırıkadze sheberhanasynda tálim alǵan jas kınoger.
Ssenarıı avtorlary - Elzat Eskendir jáne О́mirjan Ábdihalyquly. Basty rolderde - belgili akterler Asylbolat Smaǵulov, Baıan Qajynábıeva, Dýlyǵa Aqmolda jáne balanyń rólin Maqsat Ábdirahman oınady.
Elzat Eskendirdiń marapattalyp jatqan sátin Feısbýk áleýmettik jelisinde ıakýtııalyq SREDA Stýdııasynyń qoıýshy operatory Ivan Semenov quttyqtap, osy sátti máńgi este saqtaıtynyn aıtty.