Halyq múddesin kózdegen tarıhı qadam

Elbasynyń memlekettik bılik tarmaqtary arasyndaǵy ókilettilikterdi qaıta bólý boıynsha jasaǵan Úndeýine oraı, keshe elordada «Nur Otan» partııasynyń uıytqy bolýymen «Qazaqstan-2050» demokratııalyq kúshterdiń jalpyulttyq koalısııasynyń otyrysy ótti. Elbasy jarııalaǵan Úndeýdi eli­mizdegi barsha qoǵamdyq uıymdar, saıası partııalar, memlekettik emes uıymdar, azamattyq qoǵam músheleri úlken tarıhı oqıǵa retinde qabyldap, óz kózqarastaryn bildirip jatqany belgili. Demokratııalyq kúshterdiń jalpyulttyq koalısııasynyń otyrysyna elimizdegi jetekshi saıası partııalar men qoǵamdyq birlestikterdiń basshylary qatysty. Kezdesýdi júrgizgen «Nur Otan» partııasy Tóraǵasynyń birinshi orynbasary Muhtar Qul-Muhammed Elbasy Nursultan Nazarbaev jarııalaǵan saıası júıeniń memlekettilikti nyǵaıtýǵa, bılik tarmaqtary qyzmetiniń tıimdiligi men jaýapkershiligin arttyrýǵa ba­ǵyt­talǵanyn atap ótti. «Nur Otan» partııasy Tóraǵasynyń birinshi orynbasary: – Jalpyulttyq koalısııa asa iri saıa­sı oqıǵaǵa oraı bas qosyp, óz pikirin bildiretin dástúr boıynsha búgin de jınalyp otyr. Elbasy usynǵan ja­ńa baǵyt memleketimizdi odan ári ny­ǵaı­týǵa jáne bıliktiń barlyq tarmaqtaryn odan ári kúsheıtýge arnalǵan. Kúshti prezıdenttik bılikti saqtaı otyryp júrgiziletin mundaı reforma elimizdegi saıası turaqtylyq pen odan ári ósip-órkendeýimizdiń berik kepili bolady dep nyq senemin, – dedi. M.Qul-Muhammed elimizdegi saıası reformalar Elbasynyń kóregendiginiń arqasynda osydan birneshe jyl buryn bastalǵanyna da toqtaldy. – Máselen, Memleket basshysy 2005 jyly halyqqa «Qazaqstan eko­nomıkalyq, áleýmettik jáne saıası jedel jańarý jolynda» atty Joldaýyn arnady. Atynyń ózi aıtyp turǵandaı, elimizdegi aldymen ekonomıkalyq, keıin áleýmettik jańǵyrý jumystary osydan 12 jyl buryn bastaldy. Endi kezek naqty saıası reformalarǵa da keldi, – dedi spıker. «Aq jol» partııasynyń tóraǵasy Azat Perýashevtyń aıtýynsha, partııa tóralqasynyń arnaıy otyrysy ótip, Elbasy Úndeýinde aıtylǵan baǵyttar boıynsha ortalyq organy men fılıaldarynda talqylaýlar ótkizý jón dep sheshilipti. – Demokratııalandyrýdy jal­ǵas­tyrý, Parlamenttiń ókilettigin keńeıtý, memlekettik organdardyń halyq pen qoǵam aldyndaǵy eseptiligin qamtamasyz etý – bizdiń partııanyń jarǵysynda kórinis tapqan basty qaǵıdattardyń biri. Sol sebepti, biz bul Úndeýdi úlken úmitpen jáne senimmen qabyldadyq. Elbasy qoǵam aldyna ýaqyt talaptaryna saı jańa mindetter qoıyp otyr. Úndeýde aıtylǵandaı, biz úshin saıası partııalardyń rólin kúsheıtý máselesi óte mańyzdy. Eger Úkimet qurylymy men quramy saılaý­da jeńgen partııanyń artyqshylyǵy boıynsha jasaqtalatyn bolsa, bul – barlyq partııalar úshin bıliktiń ókiletti organdarynda ǵana emes, basqa organdarynda da bolýǵa degen úlken múmkindik, – dep atap ótti A.Perýashev. «Aýyl» partııasynyń tóraǵasy Álı Bektaevtyń pikirinshe, Úkimetke qatysty atqarýshy organdar elimizdi damytýdaǵy, ekonomıkalyq áleýetin arttyrýdaǵy basty jaýapty organ bolýy tıis. Parlamenttiń de jaýapkershiligi artýǵa tıis. – Munyń barlyǵy halyq múddesi úshin, elimizdiń bolashaq damýy úshin qolǵa alynyp otyr. Ol Bes ınstıtýttyq reformaǵa sáıkes keledi. Sol sebepti, «Aýyl» partııasy basqa áriptesteri sııaqty jergilikti fılıaldarynda, bastaýysh partııa uıymdarynda ony tereń talqylaıtyn bolady. Halyq tarapynan aıtylǵan usynys-pikirler jınaqtalady. Biz soǵan uıytqy bolýymyz kerek, barshańyzdy soǵan shaqyramyn, – dedi Á.Bektaev. Jalpy, osy jıynǵa qatysqan «Aq jol», «Aýyl» partııalarynyń, Qazaq­stan Kommýnıstik halyq partııasynyń jetekshileri Úndeýde kózdelgen saıa­sı reformalardyń  kóńilderinen shy­ǵa­tynyn, ony qoldaıtyndaryn aıtty. Olar, sondaı-aq,  Prezıdenttiń kons­tıtýsııalyq reformasyn halyq arasynda jan-jaqty túsindirýge, talqylaýǵa da­ıyn ekendikterin jetkizdi. Partııa jetekshileriniń aıtýynsha, Parlament saılaýynda olardy qoldaǵan daýys berýshiler Elbasy Úndeýin talqylaýǵa atsalysyp, ózderiniń túrli ótinishterin joldaýǵa tıis. Partııalardyń árqaı­sysy ózderine kelip túsken ótinishterdiń barlyǵyn júıelep, Memleket basshysy janyndaǵy Jumys tobyna usy­natyn bolady. Qazaqstan halqy Assambleıasynyń músheleri Memleket basshysynyń ózekti ári der ýaqytynda jarııalanǵan Úndeýin qoldaıdy. Assambleıa atynan saılanǵan Parlament Májilisiniń depýtaty Iýrıı Tımoshenko osylaı dedi. – Qazaqstandyq etnostarǵa Par­lament Májilisinde depýtat retinde ókilettilikterin usynýǵa kepildi múm­kindik jasaldy. Bul oraıda, Memleket basshysynyń Parlamenttiń ókilettigin kúsheıtý, Úkimettiń jaýapkershiligin arttyrý týraly bastamasy Qazaqstanda turaqtylyq pen beıbitshilikti qam­ta­masyz etýge qosymsha kúsh beredi. О́zimniń jáne Qazaqstan halqy Assam­bleıasyna múshe áriptesterimniń atynan, elimizdegi barlyq etnomádenı bir­les­tikterdiń atynan Memleket basshy­synyń Úndeýinde aıtylǵan konstı­týsııalyq refomany halyq arasynda túsindirýge ázir ekenimizdi aıtqym keledi, – dedi Májilis depýtaty. Alqaly jıynǵa Koalısııa qura­myn­daǵy saıası partııalar jetekshilerimen qatar, Sybaılas jemqorlyqqa qarsy is-qımyl boıynsha jalpyulttyq qozǵalystyń prezıdenti Oralbaı Ábdi­kárimov, Qazaqstan Azamattyq alıan­synyń prezıdenti Nurlan Erimbetov, Halyq Qaharmany, Qarýly Kúshter ardagerleri qoǵamdyq birlestiginiń tór­aǵasy Baqytjan Ertaev, Ulttyq ınjenerııa akademııasynyń prezıdenti Baqyt­jan Jumaǵulov, Ulttyq akade­mııanyń prezıdenti Murat Jurynov, «Ata­meken» kásipkerler palatasynyń tó­r­aǵasy Abylaı Myrzahmetov qatys­ty. «Nur Otan» partııasy Tóraǵasynyń birinshi orynbasary M.Qul-Muhammed aıtyp ótkendeı, Elbasy Úndeýin bir aı kóleminde talqylaý kózdelgen. Ár­bir qoǵamdyq uıym, saıası partııalar, úki­mettik emes uıymdar túrli shara­lar ótki­zip, sonda jınaqtalǵan usy­nys­tar­dy tıisti Jumys tobyna tapsyra alady. Jıyn sońynda Koalısııa Elbasy usynǵan memlekettik basqarý júıesin jańǵyrtý jónindegi josparǵa qoldaý bildirip, barlyq qazaqstandyqtardy ony talqylaýǵa shaqyrdy. Ol «Qa­zaqstan-2050» demokratııalyq kúsh­terdiń jalpyulttyq koalısııasynyń el halqyna jasaǵan qorytyndy ún­deýinde kórinis tapty. Arnur ASQAR, «Egemen Qazaqstan»