Joba Elbasynyń «Bolashaqqa baǵdar: Rýhanı jańǵyrý» atty maqalasyndaǵy úsh tildi meńgerý saıasatyn iske asyrýǵa arnalǵan. Medeý aýdany ákimdigi uıymdastyrǵan «Tilder parki» atty kýrs aptasyna úsh kún jumys isteıdi. Segiz til mamany sabaq beredi. Búginge deıin kýrsqa qatysýǵa 600 adam ótinish bergen. Oqýshylarǵa tamyz aıynyń sońynda arnaıy sertıfıkat beriledi.
– Qazaq tili – memlekettik til, orys tili – resmı til jáne aǵylshyn tilin, ıaǵnı halyqaralyq tildi bilýimiz kerek. Jas bolsyn, orta jas bolsyn, úlken ata-analar bolsyn, ony bilip, meńgerý eshqashanda kesh emes. Sol sebepten biz osy taza aýada, jazda balalarymyz kompıýterdiń aldynda otyrmaı, osy tildi meńgersin, jetik meńgersin dep shaqyramyz, – dedi Medeý aýdanynyń ákimi Erjan Jylqybaev.