Atap aıtqanda, óńir jańashyldary men ǵalymdary jáne óndiristik kásiporyndar jetekshileri kórmeniń basty taqyryptarynyń biri – «jasyl ekonomıkaǵa» qatysty óz jobalaryn ázirledi. Osyǵan oraı oblystaǵy «TalanTeshnology» JShS qoqys óńdeý zaýyty kórmege kelýshilerge TMD aýqymynda eshqandaı balamasy joq aıryqsha jobalar ázirlegen. Sonymen birge, «Kempirsaı» jel-elektr stansasy jáne «Iýnaıted Enerdjı Aqtóbe» zaýyttary sekildi kásiporyndar usynǵan ónimderde álemniń ár qıyrynan kelgen kórmeni qyzyqtaýshylardy enjar qaldyra almaıtynyna senim mol. EKSPO-2017 halyqaralyq kórmesi aıasynda Astanaǵa kelgen meımandar keń-baıtaq Qazaqstannyń kórikti de kıeli qoınaýlarymen tanysyp, keńinen aralaıtyny jóninde de arnaıy baǵdarlama jasaqtalǵany belgili. Bul baǵytta olar úshin Aqtóbe aımaǵynda eki týrıstik marshrýt belgilengen. Onyń birinshisi – «Qobda – batyrlar Otany» taqyryby boıynsha osy qasıetti topyraqpen tanysý bolyp otyr. Sonymen birge, qazaqtyń batyr qyzy Álııa Moldaǵulovanyń týǵan jeri Bulaq aýylyn aralaıdy. Ekinshi baǵyt «Mártók-Aqqaıyń» baǵyty boıynsha bolmaq. Munda saıahatshylar bul ólkeniń ósimdikter men janýarlar dúnıesiniń qaıtalanbas kelbetine qanyǵa alady. О́ńirde kólik-logıstıka qyzmetiniń joǵary deńgeıde damyǵany jáne yńǵaıly temir jol qatynasy men Aqtóbe qalasyndaǵy halyqaralyq deńgeıdegi áýejaıdyń qalypty qyzmeti, el qonaqtarynyń óńirge kelýine qolaıly jaǵdaı týǵyzady, deıdi Aqtóbe oblystyq syrtqy baılanystar jáne týrızm basqarmasynyń basshysy Ermek Kenjehanuly. Sonymen birge, onyń aıtýy boıynsha Aqtóbe mádenıet pen óner qyzmetkerleri de Astanaǵa kelip, kórmege qatysýshylarǵa óz ónerlerin usynbaq. Munda ásirese, qolóner sheberleriniń tól týyndylaryna basymdyqtar berilmek. Qazaqtyń zergerlik buıymdary men áshekeıleri ulttyq brend deńgeıinen tabyla alatyn qundylyqtar desek, qatelese qoımaspyz. Bul turǵyda jıyrma bes aqtóbelik qolóner sheberiniń óz jobalaryn etnoaýyl jobasy aıasynda qonaqtarǵa usynýy artyqtyq etpesi anyq. «Qazaq poezııasynyń pat- rıarhy Qadyr Myrza Áliniń osydan kem degende 40 jyl buryn jazylǵan «Qazaqtardy sheteldik qonaqtarǵa tanystyrý» degen tamasha óleńi oqyrmandarǵa jaqsy tanys dep oılaımyn. Bul ólmeıtin, óshpeıtin, rýhanı qundylyǵyn eshýaqytta joǵaltpaıtyn naǵyz klassıkalyq týyndy. Halqymyzdyń boıyndaǵy barlyq jaqsy qasıetter osy óleńde kórinis tapqan. Kórme kezinde bul poezııa týyndysyn qazaq, orys jáne aǵylshyn tilderinde kórneki oryndardyń birine ilip ornalastyrsa artyqtyq etpes edi» degen oıyn bildirdi gazet tilshisine Halyqaralyq «Qazaq tili» qoǵamy oblystyq bólimshesi tóraǵasynyń orynbasary Janǵabyl Qabaqbaev. Mine, aqtóbelikterdiń sheteldik qonaqtarǵa usynatyn tartý-taralǵylarynyń syr-sıpaty osyndaı.
Temir QUSAIYN, «Egemen Qazaqstan»
AQTО́BE