Lı DENSÝ, QHR «Sınhýa» agenttigi Eýrazııa bıýrosynyń tilshisi: – Bul meniń Astanaǵa eń alǵash kelýim. Biz EKSPO-2017 kórmesi óte jaqsy deńgeıde ótedi dep kúttik. Daıyndyq sharalaryna qarap, kópshiliktiń úmiti aqtalatynyna senimdi bolyp júrmin. Barlyq ǵımarattardyń ajary tańdaı qaqtyrady, óte ádemi. Kez kelgen nysannyń zaman talabyna saı salynǵanyn kóremiz. Meniń oıymsha, Qazaqstan kórmeni deńgeıine saı uıymdastyrady. Qytaılyq «Sınhýa» agenttiginen jıyrma shaqty jýrnalıst qazaq topyraǵyna taban tiredi. Jalpy, Aspanasty elinen 100-ge tarta buqaralyq aqparat quralynyń ókili osynda bas qostyq. Biz tikeleı efır arqyly kóptegen reportajdar jasaıtyn bolamyz.
Dına SEKORSKAIа, Reseı Federasııasynan kelgen saıahatshy: – Men energetıka salasynyń mamanymyn, sondyqtan Astanada bastalǵan EKSPO kórmesiniń taqyryby meni qatty qyzyqtyrady. Halyqaralyq sharaǵa júzden astam memleket qatysatynyn estidim. Al olardyń arasynda balamaly energııa kózderin óndirýden sharyqtap damyǵan elderdiń de bary sózsiz. Osy kórmedegi ǵylymı jańalyqtar men jetistikter tájirıbege enip, ıgilikke aınalatyn bolsa, paıdasy ushan-teńiz bolar edi. Biz sol kezde jańa órkenıettiń shyńyn baǵyndyrǵan dáýirdi basymyzdan ótkeremiz. Mamyr aıynan beri Qazaqstan óńirlerin aralap júrmin. Shymbulaq, «Medeý», Sharyn shatqalynan alǵan áserlerimdi sózben aıtyp jetkize almaımyn. Mundaı tabıǵat peızajyn áli kúnge kórgen emespin. Astana qalasynyń ajary tipti bólek. Záýlim ǵımarattar kóz arbaıdy, sáýlet keshenderi súısindiredi.
Jeńis NURLYBEK, Taraz qalasynyń turǵyny: – Astanaǵa Áýlıeata shaharynan shyqqan ekskýrsııa tobymen ilesip keldim. Bas qalamyzǵa osy ýaqytqa deıin birneshe márte tabanym tıgen. Ár kelgen saıyn ártúrli áserge bólenetinim bar. Osy EKSPO kórmesiniń ashylýyn tamashaladym. Kórme qalashyǵyndaǵy ǵımarattardyń sáni bólek áńgime, alǵashqy kúngi mýltımedıalyq shoý, otshashý, ózge de merekelik jıyndar kóńilimizdi kóterdi, aıryqsha áser syılady. Birinen keıin biri ashylyp jatqan ár pavılonda ártúrli jańalyq baryn sezemin. О́ıtkeni, bir-birin qaıtalamaıdy, uqsamaıdy. Olardaǵy ǵajaıyptardyń qaı-qaısy da tańdaı qaqtyrmaı qoımaıdy. Meniń qýanǵanym, dál ortadaǵy dóńgelek sferada ornalasqan elimizdiń pavılony basqa memleketterdiń pavılondarynan esh kem emes. Bizdiń ónertabystarymyz ben jańalyqtarymyz da kópke shapaǵatyn tıgizetini sózsiz.
Jazyp alǵan Ashat RAIQUL, «Egemen Qazaqstan»