Bul týraly oblys ákimi Janseıit Túımebaev óńirdegi «Nurly jol» baǵdarlamasynyń oryndalýy týraly ótken májiliste aıtty. Aımaq basshysy mundaı sheshimdi oblystyq qurylys basqarmasynyń basshysy Quttybek Jamashevtiń Qazyǵurt, Saıram, Shardara aýdandary men Shymkent qalasyndaǵy mektep qurylysynda oryn alǵan olqylyqtar boıynsha baıandaǵan málimetine sáıkes aıtty.
Basqarma basshysynyń habarlaýynsha, Qazyǵurtta eki 300 oryndyq mekteptiń qurylysy keshikse, Saıramdaǵy tórt bilim oshaǵynda birqatar qurylys normalary saqtalmaǵan. Shardaradaǵy bir mektep pen Shymkenttegi eki bilim oshaǵynda da jaǵdaı osy ispettes.
Máseleniń mán-jaıyna qanyqqan oblys ákimi qurylysta kemshilikterge jol bergen aýdan, qala ákimderiniń jumysyn synǵa aldy. Negizgi sebepti qurylys nysanyn salýshy merdiger mekemege siltegen basshylardyń ózderine eskertý jasady.
Eger jumys osylaı jalǵasa beretin bolsa, jaýapkershilikterińizdiń joqtyǵynan keleside jańa qurylys nysany aýdandaryńyzǵa berilmeıtin bolady. Bir aýdanǵa bir mektep salý - bul sol aýdan úshin, ondaǵy halyq, balalar úshin úlken qýanysh. Sizderdiń nemquraılylyqtaryńyzdan týyndaıtyn bolmashy kemshilikterdiń oryn alýy halyqqa zııanyn tıgizbeýi tıis», - dedi oblys ákimi.
Sonymen birge, óńir basshysy jıynda «Nurly jol» baǵdarlamasy boıynsha nysandardyń qurylys jumystarynyń sapaly jáne merziminde atqarylýyn qamtamasyz etýdi, qalys qalyp otyrǵan nysandar boıynsha 2, 3 aýysymda qurylys jumystaryn uıymdastyrýdy, sondaı-aq, jumystyń sapasyna baqylaýdy báseńdetken jaýapty qyzmetkerlerdiń tártiptik jaýapkershiligin qaraýdy tapsyrdy.