Qazaqstan polısııasynyń 25 jyldyǵy qarsańynda oblystyq Ishki ister departamenti tarapynan atqarylyp jatqan aýqymdy sharalar arasynan esil erlerdi ulyqtaý, esimderin jańǵyrtý baǵytyndaǵy ıgilikti ister kóńil toǵaıtady. «О́li rıza bolmaı, tiri baıymaıdy» dep atalarymyz tekke aıtpasa kerek. Adamdardyń tynyshtyǵyn kúzetip, qoǵam qaýipsizdigin qamtamasyz etý jolynda qyrshynynan qıylǵan keshegi bozdaqtar qalaı áspettelse de esh artyqtyq etpeıtini anyq. Aqqaıyń aýdanynyń ortalyǵy Smırnovo kentinde Alekseı Sherbakov oqyǵan mekteptiń qabyrǵasyna memorıaldyq taqtanyń qoıylýy polısııa qyzmetkerine degen úlken qurmettiń biri, jas býyndy erlikke, adaldyqqa baýlýdyń ónegesi men taǵylymy bolsa kerek. Alekseı Keńes dáýirinde Ishki ister salasynda qyzmet etken. Ol osy aýdanda týyp-óskenimen, sanaly ǵumyryn Petropavl qalasynda ótkergen. О́miriniń sońyna deıin qylmys kóp jasalatyn Jumysshy kentindegi Dobrolıýbov polısııa beketinde aǵa ýchaskelik ınspektory qyzmetin atqarǵan. Kóbine tájirıbeli, bilikti tártip saqshylary osy aýmaqqa jiberiletin. Alekseıge de osyndaı úlken senim artylǵan. Mılısııa maıorynyń jumysqa yjdaǵattylyǵyn, temirdeı tártipti súıetinin basshylyq ta, áriptesteri de joǵary baǵalaıtyn. Sol bir qandy oqıǵany qyzy Natalıa bylaı eske alady: «Ákem otbasylyq janjal jaıly sýyt habar alysymen oqıǵa ornyna tez jetkenshe asyqqan. О́ıtkeni, eki ret sottalyp, túrmede otyryp kelgen A.Shkodınniń minez-qulqyn jaqsy biletin. Jas balalardy jazym ete me degen qaýip oıynan shyqpaǵan. Ákem jetkenshe áıeli men kórshilerin jaraqattap úlgergen. Úıge kire bergende qylmysker jasyrynǵan jerinen atyp shyǵyp, ótkir ustaramen ákemniń tamaq tusynan birneshe ret oryp jibergen. Resıdıvıstiń jeke tártibine baılanysty otbasynda birneshe ret bolǵandyqtan, dál osyndaı tegeýrindi qarsylyq kútpese kerek. Aýyr jaraqat alǵanyna qaramastan, áriptesteri kelgenshe qylmyskerdi jibermegen. Olarǵa úıde balalardyń baryn eskertip, tapansha qoldanýǵa ruqsat bermegen. Kóp qan joǵaltqanyna qaramastan aýrýhanada ózin baısaldy ustady. Baqılyq bolar aldynda aıtqan «Bul – meniń mindetim edi» degen aqtyq sózi qulaǵymda áli kúnge deıin jańǵyryp tur». Esil erdiń erligi eskerýsiz qalǵan joq. Keńes Odaǵynyń «Jeke erligi úshin» ordenimen marapattaldy. Memorıaldyq taqtanyń ashylý saltanatynda OIID-nyń bastyǵy, general-maıor Berik Bilálov, qyzy Natalıa, Reseıdiń Stavropol ólkesinen arnaıy kelgen nemeresi sóz sóılep, marqumnyń ómir jolynan estelikter aıtty.
О́mir ESQALI, «Egemen Qazaqstan»
Soltústik Qazaqstan oblysy, Aqqaıyń aýdany