Dýaldy oqý júıesin jetildirý arqyly bilim oryndary arasynda tájirıbe almasýdy maqsat etken semınarǵa «Kásipqor» holdıngi muryndyq bolǵan. «Tehnıkalyq jáne kásiptik bilim berý júıesiniń mazmunyn jańǵyrtý arqyly Qazaqstannyń agroónerkásip keshenine arnalǵan kadrlardy daıarlaýdyń ınnovasııalyq joldary» taqyrybynda ótken semınar-praktıkýmda elimizdegi kolledjderde ınnovasııalyq bilim berý tehnologııalaryn, onyń ishinde, oqytý mazmunyna modýldik-quzyrettilik tásildi qoldaný, kredıttik-modýldik tehnologııany, arnaıy pánderdi aǵylshyn tilinde oqytý, beıindi mamandyǵy boıynsha kadrlar daıarlaýdaǵy zamanaýı tásildemeler, qoldanbaly bakalavrıatty engizý men iske asyrý máseleleri talqylandy. Sondaı-aq, qatysýshylar kásiptik kolledjderde ınnovasııalyq bilim berý tehnologııalaryn kiriktirý boıynsha pikir almasty. Kolledjdiń oqý-óndiristik bazasynda bolyp, shákirtterge jasalǵan múmkindikterden, oı túıip qaıtty. Oqý-óndiristik bazasynyń oı salatynyndaı-aq bar. Elimizdiń basqa óńirlerindegi agrotehnıkalyq baǵyttaǵy oqý oryndarynyń dırektorlary ońtústiktegi áriptesteriniń isin úlgi alarlyq retinde baǵalady. Mysaly, «Kásipqor» holdıng» KEAQ basqarma tóraǵasynyń orynbasary Á.Bımendına aýyl sharýashylyǵy salasyna mamandar daıarlaýda tehnıkalyq jáne kásiptik bilim berýdiń mańyzdylyǵyna toqtalyp, oǵan oblys ákimdigi jan-jaqty qoldaý kórsetip kele jatqanyn atap ótti. Osy arada aıta ketelik, kolledjdegi bilim sapasynyń jaqsarýyna, zamanaýı jabdyqtalýyna sińirgen eńbegi joǵary baǵalanǵan oqý ornynyń dırektory K.Tólebaev Ulttyq bıznes reıtıngter odaǵy atynan beriletin «Sala kóshbasshysy» Altyn qyran belgisimen jáne bilim salasynyń bedelin arttyrýdaǵy jeke úlesi úshin «úzdik basshy» sertıfıkatymen marapattalǵan bolatyn. Al ótken jyly kóktemde Shymkent agrarlyq kolledji elimizde úzdik on kolledjdiń qataryna endi. Rasynda, kolledj dırektory, aýyl sharýashylyǵy ǵylymdarynyń kandıdaty Kenjehan Tólebaevtyń uıymdastyrýymen bes jarym gektarǵa salynǵan oqý bazasynda tájirıbe jumystaryn júrgizýge tolyq jaǵdaı jasalǵan. Eń sońǵy tehnologııalardy qoldanyp salynǵan jylyjaı, júzim, alma plantasııalary bar. Qyzanaq, bolgar buryshy, bıdaı, arpa, júgeri tanapshalarynda stýdentter eńbek etip, mol tájirıbe alýda. «Olardy tamshylatyp sýarý ádisimen kútip-baptaýdy agronomııa jáne orman sharýashylyǵy bóliminiń stýdentteri men oqytýshylary júrgizip, teorııalyq bilimderin tájirıbemen ushtastyrady. Bul da óz kezeginde shákirtterdiń mamandyǵyn tolyq meńgerip, básekege qabiletti jaqsy maman bolyp shyǵýyna kómektesedi. Eńbeksúıgishtikke, adamgershilikke, óz isin josparlap tıisti nátıje alýǵa umtylysyn arttyryp, ony is júzinde qoldanýǵa negiz bolady deıdi kolledj dırektory K.Tólebaev. Oqý bazasyndaǵy zootehnıka jáne mal dárigeri mamandyǵyna oqyp jatqan stýdentterge arnalyp salynǵan synyp bólmeleri materıaldyq-tehnıkalyq jabdyqtalýy boıynsha ınnovasııalyq bilim tehnologııasyna tolyq jaýap beredi. Joǵary ónimdi jumys jasaý úshin sońǵy úlgidegi zamanaýı elektrondy qural-saımandar alynǵan. Aýrý maldarǵa naqty dıagnoz qoıýǵa múmkindik beretin ýltradybysty tolqyndarmen zertteıtin qural-jabdyqtar, jańa syıymdylyǵymen muzdatqyshy jetildirilgen tońazytqyshtar, ınvazıvti aýrýlarǵa qarsy aǵzadaǵy jumyr qurttardy durys ajyratýǵa múmkindik beretin úlkendi-kishili zerthanalardyń barlyǵynda derlik qoldanylatyn trıhıneloskop apparaty, súttiń maılylyǵyn jáne qyshqyldyǵyn tekseretin «Laktan» atty qurylǵy, taǵy da basqa oqý-tájirıbe sabaǵyna qoldanatyn zerthanalyq jabdyqtarmen tolyq qamtamasyz etilgen. Arnaıy mal turaqtary salynyp, onda tórt túlik mal men qoıandar jáne zerthanalyq janýarlar ornalasqan. Kolledjde 15 mamandyq boıynsha daıyndalatyn stýdentterdiń túgelge jýyǵy «40 paıyz teorııa, 60 paıyz tájirıbe» ádisi arqyly bilim men eńbekti ushtastyrýda. Atalǵan oqý bazasynda aýylsharýashylyq mehanıkterin daıarlaıtyn bólim úshin arnaıy jasaqtalǵan avtoturaq jáne seh ta bar. Tehnıkanyń sońǵy túrlerimen qalaı jumys júrgizýdi úırenýge tolyq jaǵdaı jasalǵan. Sondaı-aq, salynǵanyna qyryq jyldan astam ýaqyt ótip tozýǵa aınalǵan bes qabatty stýdentter jataqhanasy kúrdeli jóndeýden ótkizilip, bólmeleri jańa jıhazdarmen jabdyqtalypty. Burynǵy úlken ashana da keshendi kúrdeli jóndeýden ótip, konservileý jáne tamaq ónerkásibi mamandaryn daıyndap jatqan bólimge oqý-tájirıbe jumystaryn, zerthanalyq sabaq ótkizetin oqý kesheni retinde paıdalanýǵa berilgen. Oqý ǵımaratynyń aldynda egilgen daqyldardy stýdentterdiń ózderi baqylaıdy, óńdeıdi. Synyp bólmeleriniń barlyǵy baǵdarlamaǵa saı jańa ınterbelsendi taqtalarmen jabdyqtalyp, ǵalamtor júıesi engizilgen. Ol óz kezeginde jańa ınnovasııalyq bilim tehnologııalaryn tolyǵymen engizýge múmkindik beredi. Mine, osyndaı jáne basqa da joǵary deńgeıdegi qamqorlyq sapaly maman daıarlaýǵa mol múmkindik berýde. Aıtpaqshy, semınar-praktıkým barysynda «Amangeldi» JShS tóraǵasy N.Quralov sharýashylyq jylyjaılarynda tamshylatyp sýarý ádisimen jumys isteıtin maman joqtyǵyn aıtty. Bul oraıda, kolledjdiń «О́simdik sharýashylyǵy» bóliminde jylyjaıda jańa tehnologııamen jumys isteıtin mamandar daıarlanýda eken. Iаǵnı, kolledj túlekteri suranysqa ıe.
Ǵalymjan ELShIBAI, «Egemen Qazaqstan»