Ádette, jastar sharasy ótkende syrnaılatyp-kerneıletip, dańǵaza dabyrlap ketetini bar. Sondaı dúbirli sharalardan jastardyń ustap qalatyny tym az ekenin de baıqap júrmiz, shalqyp, shattana sóılengen sózdiń bári sol jerde qalatyndaı kórinetin. Al bul joly Koreı jastary qozǵalysynyń V forýmy olaı bolǵan joq. Dostyq úıiniń májilis zalyna jınalǵan úrkerdeı ǵana top forým ótkizdi. Oǵan Qazaqstannyń birneshe oblystarynan Koreı jastary qozǵalysynyń jetekshileri keldi, sonymen qatar Ońtústik Koreıanyń Qazaqstandaǵy Tótenshe jáne ókiletti elshisiniń orynbasary Han Man Chýn men Qazaqstan koreıleri qaýymdastyǵynyń tóraǵasy Sergeı Ogaı qonaq retinde qatysty.
Koreı jastarynyń qozǵalysy qoǵamdyq uıymy jıyrma jyldan beri ilkimdi de belsendi jumystar júrgizip keledi. Olar qaýymdastyq josparlaǵan sharalardyń barlyǵyna qatysyp, bastama kóterip, túrli jobalardy júzege asyryp otyrady. Sonymen qatar Koreı jastary qozǵalysy kóp ultty, ınternasıonaldyq uıym bolyp tabylady. Olar tek aqyldy, kreatıvti, talantty jastardyń basyn qosyp, bir maqsatqa jumyldyrady. Qostanaı memlekettik pedagogıkalyq ınstıtýty shet tilder fakýltetiniń I kýrs stýdenti Karına Oljabaeva osy jastar uıymynyń belsendi múshesi eken.
–Bizdiń uıymda barlyq ulttyń ókilderi bar. Bizdiń maqsatymyz tıimdi, naqty ister tyndyryp, Otanymyzdyń gúldenýine úles qosý, dostyqty, birlikti, patrıotızmdi nasıhattaý bolyp tabylady. Mysaly, maǵan koreı tili, mýzykasy unady, koreı ultynan dostarym bar. Men salmýnorı aspabynda oınaýdy úırenip alǵanmyn, qazir topta oınaımyn. Biz túrli jobalardy júzege asyramyz, Qazaqstannyń memlekettik merekelerinde túrli shara ótkizemiz, ózge ulystardyń ulttyq merekelerinen de tys qalmaımyz, qaıyrymdylyqpen aınalysamyz. Mysaly, bıyl jazda «Úlken el – úlken otbasy» jobasy aıasynda Torǵaı óńirinde, oblystyń basqa aýdandarynda bolyp, qaıyrymdylyq konsertin berdik, – deıdi Karına.
Forýmda Qostanaı oblystyq Qazaqstan halqy Assambleıasy tóraǵasynyń orynbasary – hatshysy Májıt Shúlenov, Ońtústik Koreıanyń Qazaqstandaǵy Tótenshe jáne ókiletti elshisiniń orynbasary Han Man Chýn, Qazaqstan koreıleri qaýymdastyǵynyń tóraǵasy Sergeı Ogaı, Qostanaı oblystyq koreı etno-mádenı qoǵamdyq birlestiginiń tóraǵasy Igor Kım jastardy quttyqtap sóz sóıledi.
– Eki el arasyndaǵy yntymaqtastyq Qazaqstan táýelsizdigin alǵan jyldardan bastap damyp otyr. Jastarsyz qaı ulttyń da bolashaǵy joq. Eki el arasyndaǵy ekonomıkalyq, saıası, mádenı jáne sporttyq qatynastardy óristetetin sizdersizder, – dedi Han Man Chýn.
Búginde Qazaqstanda koreı ultynyń tórtinshi urpaǵy turyp jatyr. Bıyl koreılerdiń Qazaqstanǵa zorlyqpen qonys aýdarylǵanyna 80 jyl tolady. Qazaqstan koreıleri qaýymdastyǵynyń tóraǵasy Sergeı Ogaı jastar qozǵalysynyń tamasha bastamalaryn kórgisi keletinin aıtty. Qaýymdastyq bıyl áleýmettik rolıkterge baıqaý jarııalaǵan bolatyn. Alty aıdyń ishinde oǵan 200-den asa jumys túsken, sonyń arasynan 30 rolık iriktelip alynyp, baıqaýǵa qatystyryldy. Onda birinshi jáne ekinshi oryndy qostanaılyq jastar jeńip aldy. Forýmda olardyń jumysy kórsetilip, Batyr Ospanov pen Kırıll Kogaıǵa júldeleri tapsyryldy.
– Men rolıkte jasóspirimderdi sýısıdke bastaıtyn psıhologııalyq tyǵyryqtan alyp shyǵý, baqytsyz jaǵdaıdyń aldyn alý onyń ortasynyń, eresekterdiń mindet-paryzy ekenin aıtqym keldi, – deıdi «AgromashHoldıng» mashına qurastyrý zaýytynda qyzmet isteıtin Batyr Ospanov. Qazaqstan koreıleri qaýymdastyǵynyń tóraǵasy Sergeı Ogaı bıyl bul áleýmettik rolık baıqaýyn tájirıbe retinde bastaǵanyn, aldaǵy ýaqytta jyl saıyn ótkiziletinin aıtty. Ol forýmǵa qatysýshy jastarmen emen-jarqyn áńgimelesti, olardyń saýal, usynystaryn, pikirlerin tyńdady.
– Qazir álem ózgerip otyr. Biz, bıznestegi, basqa da salalardaǵy aǵa býyn ókilderi, top menedjerler birigip, jastarmen jumys júrgizemiz. Bizdiń aramyzdan jańa lıderler ósip shyǵýy tıis. Olar aldyńǵy býynnyń sońynan erip, Qazaqstannyń ıgiligine jumys isteýi kerek. Elbasy aldymen elý eldiń qataryna kirý týraly maqsat qoıǵanda ol bizge ertegideı kóringen edi. Al qazir sol elý eldiń qataryndamyz, endi Qazaqstan ozyq otyz eldiń arasynan kórinýi úshin alǵa umtylamyz. Qazaqstannyń qalaı damyp otyrǵanyn bilesizder. Damý barlyq saladaǵy ozyq isterden turady, al ony júzege asyratyn taǵy da jastar. «Búgingi jastardyń maqsat-múddesi qandaı?» degen oıdy otyrystyń taqyrybyna aınaldyrǵym keledi, – dedi Sergeı Otaı.
Forýmǵa qatysýshylar jergilikti jerlerde jastardyń ózimen ózi tomaǵa-tuıyq qalatynyn, ortalyqpen baılanystyń nasharlyǵy týraly, taǵy basqa kóptegen ótkir máseleler men oılaryn ortaǵa saldy. Sergeı Ogaı jastardy túrli bastama kóterip, qyzyqty jobalar jasaýǵa shaqyrdy. Bul oraıda olarǵa barlyq kómek kórsetiletinin de jetkizdi.
Forým aıasynda trenıng, tájirıbelik jumystar uıymdastyryldy. Jastar sharasy ádettegideı kóńildi konsertpen aıaqtaldy.
Názıra JÁRIMBET, «Egemen Qazaqstan»
QOSTANAI